АЛМАТЫ. Наурыздың 12-сі. ҚазАқпарат /Ерлік Ержанұлы/  - Еуропа тарихындағы шығыс әлемінің рөлі әлі айқындалып болған жоқ. Бұл жайлы бүгін  Алматыда  өтіп жатқан "Ықпалдастық пен қайта құру үрдісіндегі Орталық Азия мен Еуропа тарихының тұжырымдамалық мәселелері" деп аталатын халықаралық ғылыми-теориялық конференцияда айтылды, 

  деп хабарлайды ҚазАқпарат.

     "Еуропа Шығыс әлемін әлі толық білмейді. Бұған  Еуропа пен Шығыстың арасындағы біржақты байланыс  өз ықпалын тигізді. Себебі, Шығыс елдерінің көбі ұзақ уақыт бойы Еуропаның отары болды. Отарлық империялардың әруақытта түпкі мақсаты - өзге халықтарды кемсіту,  тілі мен   мәдениетінен айырып,  құбыжық жасау. Соның нәтижесінде күні бүгінге дейін осы тарих сол күйінде жазылып келе жатыр. Бірақ олар түк білмейді деуге болмайды. Бейбарысты әлемге танытқан Қазақстан емес, Еуропа елдері. Ғұндардың көсемі - Еділ патшаны да жақсы біледі. Енді олар білмеген тарихты біз жазумыз керек", дейді тарих ғылымының докторы Серік Мәшімбаев. Қазақтың әл-Фараби атындағы ұлттық университеті профессорының айтуынша,   тарихта Еуропаға  Шығыс әлемінің әсері түбінде  толық дәлелденеді. Бұл үшін    біз біліммен жан-жақты қаруланып,  шет тілін жетік білуіміз керек.  Ғалымдар Еуропа елдеріне барып дәріс оқып, шет тілдерінде кітаптар жазуы қажет. Әзірге ол өз деңгейінде емес. Дегенмен сең бұзылды. Жастар шет елдерде оқып, түрлі дерек көздері бойынша ғылыми еңбектер жазуда.  Мәселен, "Мәдени мұра" бағдарламасы аясында былтыр біздің оқытушыларымыз  Австрия, Венгрия, Германия сияқты елдерге  барып қайтты", дейді Серік Мәшімбаев.