ҚР Экономикалық қылмысқа және сыбайлас жемқорлыққа қарсы күрес агенттігі төрағасының орынбасары, қаржы полициясының генерал-майоры Андрей Лукин тұрғындарды жеке мәселелері бойынша қабылдады, деп хабарлайды ҚазАқпарат тілшісі.

Қабылдауға келген жиырмадан астам адамның арызы негізінен алаяқтардан алданып қалу, шағымды тексеруде сөзбұйдалыққа салыну, тұрғын үйге меншік құқығы және жол полициясы қызметкерлерінің заңсыз іс-әрекетіне қатысты болды. Андрей Лукин қай шағымның да қараусыз қалмайтынын, тиісті шаралар алынатынын жеткізді.

А.Лукиннің айтуынша, бұл - оның БҚО-ға екінші рет келуі. Өткен жылы ақпан айында 34 адамды қабылдап, олардың арыз-шағымы тексерілген екен. Биылғы шағымдар да «Нұр Отан» партиясы мен агенттіктің бақылауында болмақ.

Аталмыш шара «Нұр Отан» ХДП мен аталмыш агенттік арасында қол қойылған өзара ынтымақтастық жөніндегі меморандум аясында жүзеге асырылуда.