АСТАНА. Наурыздың 12-сі. ҚазАқпарат /Ернұр Ақанбай/ - Қазақстанда Мұнай және газ министрлігі құрылды. Оны бұрынғы Энергетика және минералдық ресурстар министрлігінің басшысы Сауат Мыңбаев басқарады.  Бұл туралы бүгін Ақордада Үкімет мүшелерінің және облыс әкімдерінің қатысуымен  өтіп жатқан Индустриялық даму мәселері жөніндегі кеңесте Елбасы Нұрсұлтан Назарбаев мәлім етті,

 деп хабарлайды ҚазАқпарат.

 «Мұнай-газ секторын дамыту саясатын жүзеге асыру үшін және онымен қандай да бір нақты министрлік шұғылдануы үшін біз Мұнай және газ министрлігін құрамыз», деді отырыста Президент.

 Елбасының айтуынша, бұл министрлік  «ҚазМұнайГаз» компаниясын мемлекеттің және коммерциялық мүдделердің қайшылығын тудыратын өзіне тән емес функциялардан босатуға мүмкіндік береді.

 «ҚазМұнайГаз» компаниясының қызметі тек қана коммерциялық сипатта болуы тиіс. Тек осы жағдайда ғана «ҚазМұнайГаз» халықаралық деңгейдегі  корпорация  бола алады», деді Мемлекет басшысы.