АЛМАТЫ. Наурыздың 12-сі. ҚазАқпарат /Ерлік Ержанұлы/ - Алматыда "Ықпалдастық пен қайта құру үрдісіндегі Орталық Азия мен Еуропа тарихының тұжырымдамалық мәселелері" деп аталатын халықаралық ғылыми-теориялық конференция өтіп жатыр,

деп хабарлайды ҚазАқпарат.

Қазақтың әл-Фараби атындағы ұлттық университетінің тарих факультетінде өтіп жатқан бұл  шара Қазақстандағы Германия жылына арналған. Мақсат - қайта құру мен ықпалдастық жағдайында тарихи даму мен халықаралық қатынастардың жетекші ұстанымдары мен болашағын талдау және  ғылым, білім байланысын дамытуға үлес қосу. Конференция жұмысы: "Шығыс пен батыстың мемлекеттік құрылымдарындағы этносаяси және әлеуметтік-экономикалық үдерістер", "Еуразиялық  идеологиясы: тарихи- мәдени мәселелері мен перспективасы", " Көшпелі өркениет және Қазақстан: саясат, қоғамдастық, рухани даму" деген секциялар бойынша өтуде. Қазақстан, Ресей және Германия елдерінің 100-ге жуық ғалымдары бас қосқан бұл алқалы жиын барысында  "Н.Назарбаевтың еуразиялық идеясы және Қазақстанның интеллектуалдық элитасы" деп аталатын дөңгелек үстел болады деп  жоспарланып отыр.