КӨКШЕТАУ. Наурыздың 12-сі. ҚазАқпарат /Жанмұрат Жанайдаров/ - Көкшетаудағы Біржан сал атындағы музыка колледжінде өткен жас өнерпаздардың 44-ші облыстық байқауында республикалық сайысқа қатысушылар анықталды,

деп хабарлайды ҚазАқпарат тілшісі.

 Өнер додасында 37 оқушы мен музыка және өнер мектептерінен алты хор ұжымы қатысып, бақтарын сынады. Бұл жолы тоғыз аудан мен Көкшетау, Степногор қалаларынан келген жас әншілер мен орындаушылар шеберліктерімен көзге түсті. Байқау шартына сәйкес әр үміткер Бах, Бетховен, Гайда, Моцарт, Шопеннің шығармаларын орындаулары тиісті болса, қатысушылардың қай-қайсысы болмасын талап биігінен көріне алды. Қазылар алқасының ұйғарымымен жас ерекшеліктеріне қарай көкшетаулық Тихан Максимчев, Дария Русакова мен Полина Маслова, шортандыдан Ұлықбек Орақбаев, Көкшетау балалар музыка мектебінің хор ұжымы бас жүлдені еншілеп, республикалық байқауға жолдаманы жеңіп алды. Жүлдегерлер диплом және мақтау қағаздарымен марапатталды.