ҚОСТАНАЙ. Наурыздың 11-і. ҚазАқпарат /Петр Плахотников/ - «Тобыл» ӘКК мен Қостанай облысының Амангелді ауданындағы «Нарбай» шаруа қожалығының бірлескен кәсіпорны жобалық қуатына шықты.

«Үрпек-Тобыл» ЖШС бордақылау алаңы құрылысын жүзеге асыру және жергілікті тұрғындардан 6 миллион теңгеге 200 бас іріқара төлін сатып алу үшін құрылды. Жоба бастамашысына қаражаттар өткен жылдың қыркүйек айында аударылды және ағымдағы жылдың басында-ақ «Үрпек-Тобыл» ЖШС мал қорасын және жемазық сақтайтын қойма орнын салуды аяқтады, жергілікті тұрғындардан мал басын сатып алды. Бүгінде бордақылау алаңының құрылысы аяқталды.

«Үрпек-Тобыл» ЖШС шарт бойынша алғашқы міндеттемелерін орындап шыққанмен, қол жеткенге тоқталып қалмақ емес.  Кәсіпорын директоры Таңатар Ахметовтің айтуынша, жаз шыға мұнда мал союы цехы, екінші мал қорасы және жемшөп сақтайтын қосымша қойма орындары салынбақ.