АСТАНА. Наурыздың 11-і. ҚазАқпарат /Айдар Оспаналиев/ - Бүгін Маңғыстау облысының әкімдігінде облыс әкімдігі мен Еуропалық қайта құру және даму банкі арасында жобалық қолдау жөніндегі келісімге қол қойылады,

деп хабарлайды ҚазАқпарат.

Банк өкілдері сонымен бірге «Ақтау қаласының жылу және су құбыры желілері» республикалық қазыналық кәсіпорнымен несиелік келісімге қол қоймақ.

Естеріңізге сала кетейік, Еуропалық қайта құру және даму банкі еліміздің шикізаттық емес саласына қаржы бөліп отырған ірі инвесторлардың бірі. Аталмыш ұйым Қазақстанда жұмыс істей бастағалы елдің экономика саласының түрлі секторларына 2,3 миллиард доллар көлемінде қаржы құйған. 

Аталмыш банк пен Маңғыстау облысының арасындағы құны 8 миллион доллар тұратын «Ақтау қаласындағы сумен қамтамасыз ету жүйесін жаңғырту» жобасы мен «Ақтау қаласының жылу және су құбыры желілері» республикалық қазыналық кәсіпорнына техникалық қолдау ретінде 1,5 миллион доллар бөлу жөніндегі шаралар еліміздегі жүзеге асырылып отырған ілкі жобалардың бірі. Себебі елдің тұрғын үй-коммуналдық секторы инвесторлар ерекше қызығушылық танытқан   сала.

Индустрия және сауда министрлігі өкілдерінің айтуларынша, Еуропалық қайта құру және даму банкі сияқты қаржылық құрылымдармен байланыс елімізде қолға алынған жобалардың жоғары деңгейде әрі сапалы орындалуының кепілі.