ОРАЛ. Наурыздың 10-ы. ҚазАқпарат /Елжан Ералы/ - Алматы қаласында 7-11 сынып оқушылары арасында өткізілген «Жарқын болашақ» республикалық екінші қазақ тілі олимпиадасынан батысқазақстандық талапкерлер табыспен оралды,

деп хабарлайды ҚазАқпарат тілшісі.

«KATEV» халықаралық қоғамдық қоры ұйымдастырған білім бәсекесінде бақ сынаған 300-ден астам өреннің ішінде Орал қаласындағы дарынды ер балаларға арналған қазақ-түрік лицейінің оқушылары да болды. Алты бағыт бойынша өткен республикалық олимпиаданың «Тіл білімі» сайысында аталмыш мектептің 9-сынып оқушысы Алпамыс Файзолла екінші орынды иеленіп, күміс медальды өңіріне тақты. Сондай-ақ «Мәнерлеп оқу» аталымы бойынша 8-сынып оқушысы Сұңғат Аманбаев та осындай нәтиже көрсетсе, «Жас ғалымдар» бәсекесінде 10-сынып оқушысы Санжар Нұрғалиев үшінші орынды еншіледі.

Осы олимпиадада алтын медальға қол жеткізгендер орта мектепті бітіргеннен кейін Сүлеймен Демирел атындағы халықаралық университетте грант жүйесімен тегін оқу құқығына ие болса, күміс және қола жүлдегерлерге сәйкесінше 50 және 25 пайыз жеңілдік беріледі.