ОРАЛ. Наурыздың 10-ы. ҚазАқпарат /Елжан Ералы/ - Мончегорск қаласында допты хоккейден Ресей чемпионаты бірінші лигасы командалары арасындағы финалдық сайыстар мәреге жетті,

деп хабарлайды ҚазАқпарат тілшісі.

«Ақжайық» соңғы кездесуінде айдын иелері, финалдық кездесулердің бәрінде жеңіске жетіп, жоғары лигаға жолдама алған «Кольская ГМК» командасынан 0:4 есебімен ұтылып қалды. Ал Абаканның «Саяны-Хакасия» командасы Саратовтың «Универсалымен» тең ойнап, жеті ұпаймен екінші орынға көтерілді. Алты ұпайды еншілеген «Ақжайық» қола жүлдегер атанса, «Универсал» соңғы, төртінші орында қалды. Оралдықтардың сапында тәжірибелі ойыншылардың бірі Алексей Фошин мергендігімен көзге түсті.  

Бұдан бұрынғы жылдары да «Ақжайық» финалдық сайыстарда өнер көрсетіп, екі мәрте қола жүлдегер атанған болатын.