ОРАЛ. Наурыздың 10-ы. ҚазАқпарат /Елжан Ералы/ -Орал қаласында өтіп жатқан волейболдан ерлердің ұлттық лига командалары арасындағы ҚР біріншілігінің бесінші турын жергілікті «Конденсат» сәтті бастады,

деп хабарлайды ҚазАқпарат тілшісі.

Бесінші сатыдағы оралдықтар төртінші орында келе жатқан Өскеменнің «Шығыс Свинецстрой» командасымен кездесіп, аса тартысты бәсекеде 3:2 есебімен жеңіске жетті. Енді бұл екі команданың арасын бір-ақ ұпай бөліп тұр. Плей-офф бәсекелеріне қатысатын үздік төрт команданың қатарына ілігу үшін «Конденсатқа» қалған ойындарын да ширақ өткізуге тура келеді.

Сондай-ақ алғашқы күні «Алматы» мен «Атырау» сәйкесінше «Атырау-2» және «Есіл» командаларын 3:0 есебімен ұтса, Хромтаудың «Казхромы» «ЦСКА-Алматыдан» 3:1 есебімен басым түсті.

Бесінші тур ойындары одан әрі жалғасуда.