КӨКШЕТАУ. Наурыздың 10-ы. ҚазАқпарат /Жанмұрат Жанайдаров/ - Ақмола облысына қарасты Еңбекшілдер ауданындағы «ҚазГерҚұс» жауапкершілігі шектеулі серіктестігінде тәулігіне 400 мың дана жұмыртқа алынады. Осылайша серіктестік толық қуатында жұмыс істеуге қол жеткізді,

деп хабарлайды ҚазАқпарат тілшісі.

Аудан әкімі Теміржан Хамитовтың айтуынша, осыдан жеті жыл бұрын іске қосылған құс фабрикасында қазіргі кезге дейін 88 миллион дана жұмыртқа алынып, еліміздің он облысына жөнелтілген. «ҚазАгроҚаржы» акционерлік қоғамынан несиелік қаржы есебінен салынған кәсіпорында германдық технология бойынша жұмыс толықтай автоматтандырылған. Қазіргі кезде аудан орталығының 117 тұрғыны тұрақты жұмыспен қамтамасыз етіліп отыр. Ал, олардың орташа айлық табыстары 35 мың теңге төңірегінде қалыптасқан. Бүгінде фабрикада 500 мыңнан астам құс күтімге алынған. Алдағы уақытта өз тұтынушыларына құс етін жөнелту шешімін таппақ.Соған сәйкес  жабдықтау жұмыстары қолға алынды.