АҚТӨБЕ. Наурыздың 4-і. ҚазАқпарат /Самал Ендібаева/ - Бүгін облыс әкімдігінде Денсаулық сақтау министрі Жақсылық Досқалиевтің қатысуымен 2011-2015 жылдарға арналған мемлекеттік денсаулық сақтау бағдарламасының жобасы аймақтық кеңесте талқыланды. Бұл шараға Қазақстанның төрт батыс облысы медицина ұйымдарының басшылары шақырылды.

Бұл мемлекеттік бағдарлама жобасы талқыланып отырған соңғы аймақ, одан кейін Үкіметте талқыланбақ. Денсаулық сақтау министрінің айтуынша,  мемлекеттік бағдарлама жобасы 2020 жылға дейінгі ҚР дамуы стратегиясына және Елбасының 2010 жылғы қаңтардың 29-ындағы Жолдауына сәйкес жасалып отыр, онда салауатты өмір салтын таратуға және азаматтардың бірлескен жауапкершілігіне баса назар аударылып отыр.

«Бұл ең алдымен бас дәрігерлерге емес, біздің азаматтарымызға арналған. Бұл жобада бұрынғыша, дәрігерді таңдау еркіндігі, «қаржы пациенттің соңынан жүреді», азаматтардың өзінің және айналасындағылардың денсаулығына бірлескен жауапкершілігі приниптері басты орын алады, деді Ж.Досқалиев.

Мамандардың пікірінше, жасалып отырған мемлекеттік бағдарламаны жүзеге асыру ана мен бала өлімін бір жарым есе, жалпы өлімді 15 пайызға төмендетуге мүмкіндік береді. Бұл шаралар күтілетін өмір ұзақтығын 69 жасқа дейін ұлғайтуға мүмкіндік береді.