АСТАНА. Ақпанның 9-ы. ҚазАқпарат /Руслан Ғаббасов/ - «Батыс Еуропа-Батыс Қытай» халықаралық дәлізінің құрылысына тамызға қарай 50 мың адам тартылуы тиіс. Бұл туралы бүгін Үкімет отырысында Премьер-Министрдің бірінші орынбасары Өмірзақ Шөкеев мәлім етті,

  деп хабарлайды ҚазАқпарат.

 «Батыс Еуропа-Батыс Қытай» халықаралық дәлізі бойынша мега-жоба адамдарды жұмылдыру бойынша елеулі шараларды қажет ететініне тоқталған Ө. Шөкеев, «бұл нысанда тамызға қарай 50 мың адам жұмыс істеуі тиіс. Сондай-ақ 10 мыңға жуық техника тартылуы қажет»,-деді.

Басты мақсат бұл ауқымды шараға компанияларды көптеп тарту екенін  жеткізген ол,  тендерлер халықаралық деңгейде өткізіліп жатқанын айтып өтті.

Ө. Шөкеев аталған шараларға Қызылорда облысы 2006 жылдан бері дайындық жұмыстарын бастағанын айта келе, «онда қиыршық тастардың бірнеше зауыты, битум зауыты салынды. Тиісті техника тартылды, сондай-ақ оқытудың кәсіби-техникалық орталығы құрылды. Бүгінде келген бас мердігерлер, мәселен итальяндық компаниялар келісімшарттарға қол қойды. Сондықтан наурыздың орта кезінде бұл жол бойынша жалпы жұмыс басталатындығына күмән жоқ», - деді Үкімет басшысының бірінші орынбасары.