ТАЛДЫҚОРҒАН. Қарашаның 24-і. ҚазАқпарат /Сандуғаш Дүйсенова/ - Бүгін Алматы облысы Сарқант ауданының шалғайдағы Абай ауылында жаңа мектеп ашылды.

«Біз облыс бюджетінен 308,6 миллион теңге бөлдік. Екі қабатты мектепте жылы кабинеттер, кітапхана, спортзал, өз алдына жылу жүйесі, мектептің ішінде санитарлық торап, асхана бар. «Ауыл балалары да қаладағыдай жайлы жағдайда оқуы тиіс», - деді облыс әкімінің бірінші орынбасары Амандық Баталов.

Мектеп 180 балаға арналған. Қазір мұнда 118 оқушы білім алуда. Бұл биыл іске қосылған алғашқы нысан емес. Ұйғыр ауданының Сұңқар ауылында күзде 300 орындық, Панфилов ауданының Ават ауылында 180 орындық орта мектептер ашылған болатын.

Келесі жылы Кербұлақ, Еңбекшіқазақ аудандарында, Талдықорған қаласында жаңа мектептер салынбақ.