قازاقستانعا ۇلى بريتانيانىڭ ۇزدىك دارىگەرلەرى كەلدى

استانا. قازاقپارات - بۇگىن الماتىدا «بالالارداعى مۋكوۆيستسيدوزدى دياگنوستيكالاۋ مەن ەمدەۋدىڭ وزەكتى ماسەلەلەرى» اتتى عىلىمي- تاجىريبەلىك كونفەرەنتسيا وتۋدە، دەپ حابارلايدى قازاقپارات.

 ق ر د س م  پەدياتريا جانە بالالار حيرۋرگياسى عىلىمي ورتالىعى مالىمەتىنشە، شارا اياسىندا  ۇلى بريتانيانىڭ الدىڭعى قاتارلى اۋرۋحانالارىنىڭ گەندىك اۋرۋلاردى ەمدەۋ بويىنشا ەڭ مىقتى دارىگەرلەرى رەسپۋبليكانىڭ ءار تۇكپىرىنەن كەلگەن 100-دەن استام دارىگەرلەرگە مۋكوۆيستسيدوز اۋرۋىن ەمدەۋ مەن دياگنوستيكالاۋ بويىنشا سەمينار وتكىزۋدە. اتاپ ايتقاندا، گرەيت ورموند- ستريت جانە برومپتون كورولدىق اۋرۋحانالارىنىڭ جەتەكشى دارىگەرلەرى يەن بالفۋر- لين، امماني پراساد، سيۋزان مەدج، ميلان ماتسەك، سيۋزي كەنني جانە دۇنيەجۇزىلىك مۋكوۆيستسيدوز ۇيىمىنىڭ پرەزيدەنتى تەرري ستيۋارت مىرزانىڭ ءوزى كەلگەن.

شەتەلدىك ماماندار ەكى كۇن بويى وتەتىن سەميناردا گەندىك اۋرۋلاردى ەمدەۋ ويىنشا الەمدىك تاجىريبەلەرىمەن ءبولىسىپ، مۋكوۆيستسيدوزدى دياگنوستيكالاۋ مەن ەمدەۋدىڭ زاماناۋي جانە يننوۆاتسيالىق تاسىلدەرىن ۇسىنادى. سونىمەن قاتار، مۋكوۆيستسيدوزعا شالدىققان بالالاردى دۇرىس كۇتۋ مەن تاماقتانۋ بويىنشا كەڭەستەر بەرەدى. بىلىكتىلىكتى ارتتىرۋ ماقساتىندا ءوتىپ جاتقان سەمينارعا پەدياتريالىق قىزمەتتىڭ 100-دەن استام دارىگەرلەرى: پۋلمونولوگتار، ديەتولوگتار، گاستروەنتەرولوگتار، سونىمەن قاتار، قازاقستان رەسپۋبليكاسىنىڭ بارلىق ايماقتارىنان سيرەك (ورفاندىق) اۋرۋلار بويىنشا وڭىرلىك ۇيلەستىرۋشىلەر مەن مەديتسينالىق ج و و ستۋدەنتتەرى قاتىسۋدا.

«بۇگىنگى شارا قازاقستان رەسپۋبليكاسىندا بالالارداعى سيرەك اۋرۋلاردى دياگنوستيكالاۋ مەن ەمدەۋدىڭ جاڭا ستاندارتتارىن ەنگىزۋگە ارنالعان جول كارتاسى اياسىندا وتكىزىلىپ وتىر. بۇگىنگى كۇنى قازاقستاندا رەسمي تۇردە مۋكوۆيستسيدوزعا شالدىققان 105 ناۋقاس تىركەلگەن. ءار بالا ساپالى ەم الىپ، ۇزاق ءومىر سۇرۋگە قۇقىلى. شارانى وتكىزۋدەگى باستى ماقساتىمىز ق ر دارىگەرلەرىنىڭ بىلىكتىلىگىن ارتتىرا وتىرا، مەديتسينالىق قوعامداستىقتى مۋكوۆيستسيدوز ماسەلەلەرىنە نازار اۋدارتۋ»، - دەيدى «مۋكوۆيستسيدوزبەن اۋىراتىن مۇگەدەك بالالار» ق ب قازاقستاندىق مۋكوۆيستسيدوز قاۋىمداستىعى ينديرا يزباساروۆا.

ونىڭ ايتۋىنشا، گەندىك اۋرۋعا شالدىققان ناۋقاستاردى ەمدەۋ بۇكىل الەمدە ەرەكشە قىمبات جانە الەمنىڭ بارلىق دامىعان ەلدەرىندە ارنايى مەملەكەتتىك باعدارلامالارمەن قامتاماسىز ەتىلەدى.

شارانىڭ اشىلۋىندا ق ر دەنساۋلىق ساقتاۋ مينيسترلىگىنىڭ مەديتسينالىق كومەك كورسەتۋدى ۇيىمداستىرۋ جونىندەگى ديرەكتور ورىنباسارى گۇلنار جانعاراشيەۆا:

«دەنساۋلىق ساقتاۋ مينيسترلىگى سوڭعى جىلدارى مۋكوۆيستسيدوز، بىرىنشىلىكتى يمۋنتاپشىلىعى، تۋابىتتى قان ۇيۋى بۇزىلىسى، ديۋشەن ميوپاتياسى سىندى سيرەك اۋرۋلارعا ەرەكشە نازار اۋدارىپ، ءمان بەرۋدە. 2017 -جىلدان بەرى قازاقستاندا بالالارداعى سيرەك اۋرۋلاردى دياگنوستيكالاۋ مەن ەمدەۋدىڭ جاڭا ستاندارتتارىن ەنگىزۋگە ارنالعان جول كارتاسى ىسكە اسۋدا. جول كارتاسى اياسىندا دياگنوستيكالاۋدىڭ كلينيكالىق حاتتامالارى، ناۋقاستاردىڭ ەمدەلۋ جولدارى قاراستىرىلۋدا جانە ەمدەۋ مەن دياگنوستيكالاۋ جەتىلدىرىلۋدە. ءار وبلىس ورتالىقتارىندا ورفاندىق اۋرۋلار بويىنشا ۇيلەستىرۋشىلەر بار. ولار رەسپۋبليكالىق ورتالىقتارمەن بىرىگە وتىرىپ پاتسيەنتتەرگە مەديتسينالىق كومەك بەرەدى. ەلىمىزدە مۋكوۆيستسيدوزبەن اۋىراتىن بالالار تەگىن ەمدەلىپ، تەگىن ءدارى- دارمەكپەن قامتاماسىز ەتىلەدى. دياگنوستيكالاۋ، اۋرۋدى انىقتاۋ جىلدان- جىلعا جاقسارىپ كەلەدى. بۇگىنگى باسقوسۋ سيرەك اۋرۋلاردى ەرتە انىقتاۋ، الدىن- الۋ، گەندىك اۋرۋعا شالدىققان بالالاردىڭ ءومىر ءسۇرۋ ساپاسى مەن ءومىر ءسۇرۋىن ۇزارتۋ سىندى وزەكتى ماسەلەلەردىڭ الدىن- الۋعا جانە ودان ءارى جاقسارتۋعا، سونىمەن قاتار، دارىگەرلەردىڭ بىلىكتىلىكتەرىن ارتتىرۋعا ۇلكەن سەپتىگىن تيگىزەرى ءسوزسىز دەپ بىلەمىن»، - دەدى.

 ايتا كەتەيىك، شارا اياسىندا 26 - ءساۋىر كۇنى شەتەلدىك قوناقتار ق ر د س م پەدياتريا جانە بالالار حيرۋرگياسى عىلىمي ورتالىعىنىڭ تىنىس- تىرشىلىگىمەن تانىسىپ، سيرەك اۋرۋلارعا شالدىققان بالالاردىڭ اتا- انالارىمەن كەزدەسەدى..

مۋكوۆيستسيدوز - تىنىس الۋ جانە اس قورىتۋ جۇيەلەرىن زاقىمدايتىن، دەنەنى مۋتاتسياعا ۇشىراتاتىن اۋىر گەنەتيكالىق اۋرۋ.

اۆتور: مارلان جيەمباي