ەلىمىزدەگى وزەن سۋىن ءتيىمدى پايدالانباي وتىرمىز - دەپۋتات

استانا. قازاقپارات - قازاقستاننىڭ جەرءۇستى سۋ رەسۋرستارىنىڭ قىسقارۋى ءۇردىسى بايقالۋدا. بۇل تۋرالى ماجىلىستە ترانس شەكارالىق وزەندەردىڭ سۋ رەسۋرستارىن پايدالانۋ تاقىرىبىنا ارنالعان دوڭگەلەك ۇستەل وتىرىسىندا پارلامەنت ءماجىلىسىنىڭ دەپۋتاتى قۇدايبەرگەن ەرجان ايتتى، دەپ حابارلايدى قازاقپارات.

«ساراپشىلاردىڭ باعالاۋى بويىنشا، قازاقستان ەۋرازيا كونتينەنتىندەگى سۋ رەسۋرستارىنان ايتارلىقتاي تاپشىلىق كورىپ وتىرعان مەملەكەتتەردىڭ ءبىرى. رەسپۋبليكانىڭ جەرءۇستى سۋلارىنىڭ جارتىسى شەكارالاس ەلدەردىڭ اۋماعىنان كەلەدى. سوڭعى 20 جىلدىڭ ىشىندە قازاقستاننىڭ جەرءۇستى سۋ رەسۋرستارىنىڭ قىسقارۋى ءۇردىسى بايقالۋدا. قازاقستان مەن قىتايدىڭ اۋماعىنان 24 ترانسشەكارالىق وزەندەر اعىپ وتەدى. قىتاي جاعى ءوزىنىڭ اۋماعىندا جاڭا سۋ قويمالارىن سالىپ، سۋدى ءوز جەرىندە پايدالانۋ جولدارىن ءبىزدىڭ ەلمەن ەسەپتەسپەي پايدالانۋدىڭ سالدارىنان، ءبىز سۋ تاپشىلىعىن كورىپ جاتىرمىز. دەگەنمەن دە ءبىز ەلىمىزگە كەلىپ جاتقان سۋدىڭ ءوزىن دە دۇرىس پايدالانباي وتىرعانىمىزدى اتاپ وتكەن ءجون»، - دەپ توقتالدى دەپۋتات.

ونىڭ سوزىنە قاراعاندا، سۋمەن قامتاماسىز ەتۋدىڭ قالىپتاسقان ءتارتىبى ساقتالىنباعان جاعدايدا سولتۇستىك، شىعىس، ورتالىق وبلىستارىنىڭ ونەركاسىپتەرىنە، اۋىل شارۋاشىلىعىنا ۇلكەن سوققى بولادى. ەڭ ماڭىزدىسى، بالقاش جانە زايسان كولدەرىنىڭ ەكولوگيالىق جاعدايى ناشارلاۋى مۇمكىن.

«ءبىزدىڭ ەلىمىزدە ەرتىس وزەنىنىڭ ەكونوميكالىق ماڭىزى ايتارلىقتاي ۇلكەن. ونىمەن ساناسپاۋعا بولمايدى. رەسپۋبليكا اۋماعىنداعى وزەن باسسەيندەرىندە 2,5 ميلليونعا جۋىق حالىق ءومىر سۇرەدى»، - دەدى قۇدايبەرگەن ەرجان.

اۆتور: رۋسلان عابباسوۆ