استانادا «اۋىلىم - التىن تۇعىرىم» ادەبي- ونلاين كونكۋرسى وتەدى

 استانا. قازاقپارات - «اۋىلىم - التىن تۇعىرىم» ادەبي- ونلاين كونكۋرسى بيىل ءۇشىنشى رەت وتكىزىلگەلى وتىر.

«اۋىل» پارتياسىنىڭ ءتوراعاسى، ق ر پارلامەنتى سەناتىنىڭ دەپۋتاتى ءالي بەكتايەۆ ورتالىق كوممۋنيكاتسيالار قىزمەتىندە وتكەن باسپا ءسوز ماسليحاتىندا كونكۋرستىڭ ماقساتى تۋرالى ايتىپ ءوتتى، دەپ حابارلايدى قازاقپارات.

«باستى ماقسات - قالامگەرلەردى اۋىلدىڭ رۋحاني ءومىرىن، تىنىس- تىرشىلىگىن، اۋىلدا ءجۇرىپ جاتقان الەۋمەتتىك- ەكونوميكالىق پروتسەستەردى سۋرەتتەۋگە ىنتالاندىرۋ، اۋىل قۇندىلىقتارىن ناسيحاتتاۋ، اقىندار مەن جازۋشىلاردى قولداۋ جانە شىعارماشىلىعىن دامىتۋ، «رۋحاني جاڭعىرۋ» باعدارلاماسى اياسىنداعى ماقساتتاردى جۇزەگە اسىرۋعا ۇلەس قوسۋ» ، - دەدى دەپۋتات.

ءالي بەكتايەۆتىڭ اقپاراتى بويىنشا، 2016 -جىلى كونكۋرسقا قابىلدانعان 219 شىعارما توپتاستىرىلىپ، «التىن تۇعىر» دەگەن اتاۋمەن 3 تومدىق جيناق بولىپ باسىلىپ شىقتى. جيناق «اۋىل» پارتياسىنىڭ ايماقتارداعى فيليالدارى ارقىلى كىتاپحانالارعا تاراتىلدى.

«2017 -جىلى ادەبي- ونلاين كونكۋرسقا 213 تۋىندى كەلىپ ءتۇستى. قازىرگى تاڭدا 2017 -جىلعى ۇزدىك شىعارمالاردىڭ ءۇش تومدىق توپتاماسى باسپاعا تاپسىرىلدى. ماۋسىم ايىنىڭ 8 ىندە ءۇش تومدىقتىڭ تۇساۋكەسەر سالتاناتى وتكىزىلەدى» ، - دەدى سپيكەر.

ءالي بەكتايەۆ، كونكۋرس ونلاين بولعاندىقتان، ەلىمىزدەن بولەك قىرعىزستان، رەسەي، قىتاي، موڭعوليا مەملەكەتتەرىندەگى قانداستارىمىز جانە شەتەلدە ءبىلىم الىپ جاتقان جاس قالامگەرلەر دە بايقاۋعا قاتىسۋ مۇمكىندىگىنە يە بولعانىن اتاپ ءوتتى.

«ماسەلەن، بىلتىرعى جىلعى كونكۋرسقا تۇركيا ەلىندە ءبىلىم الىپ جاتقان جاس قالامگەر قاتىسىپ، جۇلدەلى ورىندى جەڭىپ الدى» ، - دەدى قر پارلامەنتى سەناتىنىڭ دەپۋتاتى ءالي بەكتايەۆ.

سونىمەن قاتار، ءالي بەكتايەۆ 2018 -جىلعى «اۋىلىم - التىن تۇعىرىم» ادەبي- ونلاين كونكۋرسىنا العاش رەت ءورىستىلدى قالامگەرلەر دە قاتىسۋعا مۇمكىندىك الىپ وتىرعانى جايلى حابارلادى.

ءسوز سوڭىندا، ءالي بەكتايەۆ، «اۋىلىم - التىن تۇعىرىم» ادەبي كونكۋرسىنا قاتىسۋشىلاردىڭ شىعارمالارى جىل بويى adebiportal.kz پورتالى جانە auyl.kz. سايتىندا قابىلداناتىنىن جانە ءار نوميناتسيادا ۇزدىك شىعارمالارعا جۇلدەلى ورىندار تاعايىندالعانىن ايتىپ ءوتتى.

«كونكۋرسقا قاتىسۋ ءۇشىن جاسى 17 مەن 45 جاس ارالىعىنداعى قالامگەرلەر ءوز شىعارمالارىن ۇسىنا الادى. پروزا، پوەزيا، دراماتۋرگيا جانرلارى بويىنشا ەڭ ۇزدىك شىققان شىعارما اۆتورىنا ءداستۇرلى «التىن تۇعىر» سىيلىعى تاپسىرىلادى. جۇلدە قورى شامامەن 5 ميلليون تەڭگەنى قۇرايدى. نوميناتسيالار بويىنشا تومەندەگىدەي جۇلدە قورى تاعايىندالادى «اۋىل تاقىرىبىنا ارنالعان ۇزدىك پروزا» (ەسسە، اڭگىمە، پوۆەست) ؛ «اۋىل تاقىرىبىنا ارنالعان ۇزدىك پوەزيا» (ولەڭ، باللادا، پوەما) ؛ «اۋىل تاقىرىبىنا ارنالعان ۇزدىك دراماتۋرگيا» نوميناتسيالارى بويىنشا 1-ورىن  500000 تەڭگە؛ 2-ورىن  300000 تەڭگە؛ 3-ورىن  200000 تەڭگە. قوسىمشا 10 ۇزدىك قالامگەرگە 100 مىڭ تەڭگەدەن ارنايى جۇلدەلەر تاعايىندالادى» ، - دەدى دەپۋتات.

كونكۋرس قورىتىندىسى 2018 -جىلى 1 - جەلتوقساندا شىعارىلادى. جەڭىمپازداردى ماراپاتتاۋ 2018 -جىلى 11 - جەلتوقساندا وتكىزىلەدى.

 

لاۋرا امانتايەۆا