14:55, 24 - ءساۋىر 2018 | GMT +6
ازياداعا باراتىن بالۋاندار شىمكەنتتە انىقتالادى
استانا. قازاقپارات - بيىلعى جىلدىڭ باستى دوداسى - يندونەزيانىڭ دجاكارتا قالاسىندا وتەتىن جازعى ازيادا ويىندارىنا باراتىن بالۋانداردىڭ ەسىمى شىمكەنت قالاسىندا بەلگىلى بولادى، دەپ حابارلايدى قازاقپارات.
28- ءساۋىر مەن 3- مامىر ارالىعىندا شىمكەنت قالاسىندا كۇرەس تۇرلەرىنەن قازاقستان چەمپيوناتى وتەدى. بيىلعى بىرىنشىلىكتىڭ باستى ەرەكشەلىگى - ەلىمىزدىڭ ءار تۇكپىرىنەن جينالعان بالۋاندار «چەمپيوندىق» اتاققا عانا تالاسىپ قويماي، دجاكارتا قالاسىندا وتەتىن جازعى ازيادا ويىندارىنا جولداماعا دا يەلىك ەتەدى.
سول ءۇشىن بۇل دودادا وسىعان دەيىن الەم جانە ازيا چەمپيوناتىندا قانجىعاسى جۇلدەگە مايلانىپ جۇرگەن ەڭ تاڭداۋلى بالۋانداردىڭ بارلىعى سىنعا تۇسەدى.
اۆتور: كۇنسۇلتان وتارباي