قازاقستاندا ەكپەدەن باس تارتقان ازاماتتار سانى ارتقان
بۇل تۋرالى قازاقپارات تىلشىسىنە ق ر د س م سانيتارلىق-ەپيدەميالىق ساراپتاما جانە مونيتورينگ عىلىمي- پراكتيكالىق ورتالىعى ينفەكتسيالىق جانە پارازيتتىك اۋرۋلاردى ەپيدەميالىق باقىلاۋ دەپارتامەنتى ديرەكتورىنىڭ ورىنباسارى ايناگۇل قۋاتبايەۆا مالىمدەدى.
ورتالىق مامانىنىڭ ايتۋىنشا، 2018-جىلدىڭ 1- قاڭتارىنا دەيىنگى ستاتيستيكالىق مالىمەتتە ۆاكتسينالاۋعا سەنبەيتىندەر سانى 12700 ادامعا جەتكەنى كورسەتىلگەن. ون جىل ىشىندە بۇل كورسەتكىش ايتارلىقتاي وسكەن.
«ەكپەدەن باس تارقان ادامدار سانى 300 گە جەتكەندە، ءبىز مونيتورينگتى وسى سەكتورداعى ادامدارعا باعىتتادىق. ال ەكپەگە سەنبەيتىندەردىڭ قاتارىندا اتا-انالاردىڭ باسىم بولۋى - ويلاندىراتىن جاعداي. سەبەبى ولار ءوز ومىرىنەن بولەك، جاڭا تۋعان بالاسىنا ەكپە جاساتپاي، ونىڭ ومىرىنە قاۋىپ ءتوندىرۋى مۇمكىن»، - دەيدى ايناگۇل قۋاتبايەۆا.
رەسمي اقپاراتقا وراي، ەكپەگە سەنبەيتىن ازاماتتار اقتوبە، قاراعاندى، اقمولا، وڭتۇستىك قازاقستان وبلىستارىندا جانە الماتى مەن استانا قالالارىندا باسىم. سوندىقتان ەكپە جاساۋدىڭ قاجەتتىلىگى جايلى تۇسىندىرمە جۇمىستارىن وسى ايماقتاردا كۇشەيتىلگەن.
«ەكپە جاساتپاعان بالالارعا ينفەكتسيالىق اۋرۋلاردىڭ جۇعۋ قاۋپى جوعارى. ال ولارمەن ءبىر قوعامدا وزگە دە ازاماتتارىمىز ءومىر سۇرەتىندىكتەن اۋرۋدىڭ تارالۋ ىقتيمالدىعى ۇلكەن. سوندىقتان، اسىرەسە اتا-انالار بۇل ماسەلەگە نازار اۋدارۋى شارت. ەگەر ويىڭىزدى سەنىمسىزدىك پانالاسا، ەكپەگە قاتىستى كەز كەلگەن سۇراعىڭىزعا جەدەل جەلىگە تەگىن حابارلاسۋ ارقىلى تولىققاندى جاۋاپ الا الاسىز»، - دەيدى ايناگۇل قۋاتبايەۆا.
ونىڭ ايتۋىنشا، اتا-انالار سەنىمىنىڭ جوعالۋى ءوز بالاسىنىڭ دەنساۋلىعىنا سالعىرت قاراۋىنان جانە ينتەرنەتتەگى ءتۇرلى راستالماعان اقپاراتتاردىڭ اسەرىنەن بولىپ وتىر. قازىرگى تاڭدا، ازاماتتار ءوز دەرىگەرىنە قاراعاندا، الەۋمەتتىك جەلىلەردەگى تاراتىلعان اقپاراتقا كوبىرەك سەنەدى.
ايتا كەتسەك، قازاقستان ەۆروپا ەلدەرىنىڭ جىل سايىنعى ۇيىمداستىرىلاتىن يممۋنداندىرۋ اپتالىعىنا قاتىساتىن 54 ەل قاتارىنا كىرەدى. ەكپە جۇمىستارىنا قاتىستى ءتۇسىندىرۋ جۇمىستارى وسى اپتالىق بارىسىندا بەلسەندى تۇردە جۇرگىزىلەدى.