قازىرگى ۋاقىتتا ەت ەكسپورتىن ارتتىرۋعا مۇمكىندىك بار - ۇكىمەت باسشىسى

استانا. قازاقپارات - بۇگىن ۇكىمەت وتىرىسىندا ق ر پرەمەر-ءمينيسترى باقىتجان ساعانتايەۆ ەت ەكسپورتى كولەمىن ۇلعايتۋعا دايىندالۋدى تاپسىردى، دەپ حابارلايدى قازاقپارات.

«ەلباسى ءوزىنىڭ تاپسىرماسىندا ەكونوميكامىزدىڭ ءوسۋىنىڭ درايۆەرى اۋىل شارۋاشىلىعى بولۋى كەرەكتىگىن ايتتى. ونىڭ ىشىندە ەتتى مال شارۋاشىلىعىنىڭ ورنى ەرەكشە. سول سەبەپتەن بۇل جۇمىسقا ءبارىمىز بىردەي كۇش سالىپ كىرىسۋىمىز كەرەك. دەگەنمەن دە، كەزىندە 2010-2016-جىلى سىرتقا 60 مىڭ توننا ءىرى قارا مال ەتىن ەكسپورتقا شىعارامىز دەپ مىندەتتەمە العان بولاتىنبىز. ءبىراق ول مىندەتتەمە ءتۇرلى سەبەپتەرمەن ورىندالمادى»، - دەپ توقتالدى ۇكىمەت باسشىسى.

سونىمەن قاتار ول ەلباسىنىڭ تىكەلەي ارالاسۋىمەن قىتايعا جىلقى ەتى مەن قوي ەتىن كىرگىزۋگە بارلىق كەدەرگىلەر جويىلعانىن، ءباا تاراپىنان ءىرى قارا مەن ۇساق مال ەتىن كىرگىزۋ كەدەرگىلەرى الىنىپ تاستالعانان اتاپ ءوتتى. قىتايمەن ارادا وسى ءىرى قارا مال بويىنشا جۇمىستار جىلدىڭ سوڭىنا دەيىن اياقتالاتىن بولادى.

«قازىرگى ۋاقىتتا مالدىڭ سانىن كوبەيتىپ، ەكسپورتقا شىعارۋعا مۇمكىندىك بار. نارىق اشىلىپ جاتىر. سول سەبەپتەن سىزدەردىڭ بۇگىنگى باياندامالارىڭىزدا كورسەتىلگەن جوسپارلى ءىس-شارالاردى قۇزىرەتتى ورگاندارمەن كەلىسىپ پىسىقتاپ الۋ كەرەك»، - دەپ تاپسىردى ب. ساعىنتايەۆ.

ءسوز سوڭىندا پرەمەر-مينيستر اۋىل شارۋاشىلىعى مينيسترلىگىنە جەم-ءشوپ ماسەلەسىنە ايرىقشا نازار اۋدارۋدى تاپسىردى.

ايتا كەتەيىك، بۇگىن ۇكىمەت وتىرىسىندا «2018-2027- جالدارعا ارنالعان ەتتى مال شارۋاشىلىعىن دامىتۋ» باعدارلاماسى تۇجىرىمداماسىنىڭ جوباسى تانىستىرىلدى.

«اۋىلدىق جەرلەردە جالپى ەل تۇرعىندارىنىڭ 50 پايىزى ءومىر سۇرەدى جانە تىرشىلىك ەتەدى. بۇل دەگەنىمىز، اۋىل تۇرعىندارىنىڭ باسىم كوپشىلىگى وسى باعدارلاما اياسىندا جۇمىسپەن قامتىلادى. باعدارلامانى جۇزەگە اسىرۋ جاڭا مال ءوسىرۋشى-فەرمەرلەر كلاسىن قۇرۋعا مۇمكىندىك بەرەدى. باعدارلاما اياسىندا فەرمەرلىك شارۋاشىلىقتاردىڭ سانىن 20 مىڭنان 100 مىڭعا دەيىن ءوسۋىن، اۋىل تۇرعىندارىنا جۇمىس ورىندارىن 100 مىڭنان 500 مىڭعا دەيىن ۇلعايتۋعا مۇمكىندىك بولادى»، - دەدى اۋىل شارۋاشىلىعى ءبىرىنشى ۆيتسە-ءمينيسترى ارمان ەۆنيەۆ.

سونىمەن قاتار ءىرى قارا مال سانىن 7 ميلليوننان 15 ميلليون باسقا دەيىن كوبەيتۋگە، سيىر جانە قوي ەتى ءوندىرىسىن 600 مىڭ توننادان 1,6 ميلليون تونناعا دەيىن ارتتىرۋعا، ەكسپورتتان تۇسەتىن پايدا كولەمىن 2,4 ميلليارد ا ق ش دوللارىنا دەيىن ۇلعايتۋعا، 1 جۇمىسشىعا ەڭبەك ونىمدىلىگىن 1000 ا ق ش دوللارىنان 8000 ا ق ش دوللارىنا دەيىن وسىرۋگە نەگىز بولادى.

اۆتور: رۋسلان عابباسوۆ