شايماردان نۇرىموۆ: قازاقستاندىقتاردىڭ ماقساتى مەن ارمانى ءبىر
دەمەك، حالىقتىڭ الەۋمەتتىك جاعدايىن ارقاۋ ەتكەن سەسسيانىڭ بۇل جولعى ماڭىزى دا ەرەكشە بولماق. وسى رەتتە قازاقپارات ءتىلشىسى ق ر پارلامەنتى ءماجىلىسىنىڭ دەپۋتاتى، قازاقستان ۇيعىرلارى ەتنومادەني ورتالىعىنىڭ ءتوراعاسى شايماردان نۇرىموۆتى سوزگە تارتىپ، ايتۋلى شارا جايلى پىكىرىن بىلگەن ەدى.
«ەل پرەزيدەنتى نۇرسۇلتان نازاربايەۆتىڭ وكىمىمەن قازاقستان حالقى اسسامبلەياسىنىڭ جيىرما التىنشى سەسسياسى «بەس الەۋمەتتىك باستاما - قوعامنىڭ الەۋمەتتىك بىرلىگىنىڭ تۇعىرى» كۇن تارتىبىمەن شاقىرىلدى. بۇل بەس الەۋمەتتىك باستاما تەك قازاقستاندىقتاردى ەمەس، شەتەلدى دە ءدۇر ەتكىزگەنىن كوردىم. مىسالى، جاقىندا عانا ءبىز پارلامەنتتىك كەزدەسۋمەن چەحيادا بولدىق. چەحيانىڭ دەپۋتاتتارى مەملەكەت باسشىسىنىڭ بۇل الەۋمەتتىك باستامالارىنا تاڭ قالعانىن جاسىرماي وتىر. شەتەلدىك ارىپتەستەرىمىز «دۇنيەجۇزىلىك اۋقىمدا ەكونوميكالىق داعدارىس بولىپ جاتقان كەزدە پرەزيدەنت نۇرسۇلتان نازاربايەۆتىڭ وسىنشالىقتى الەۋمەتتىك باعىتتاعى جەڭىلدىكتەر مەن مۇمكىندىكتەردى بەرىپ وتىرعانى - ەڭ الدىمەن ءوز حالقىنا دەگەن ماحابباتىن كورسەتەتىنىن» تىلگە تيەك ەتەدى. مەن شەتەلدىك دەپۋاتتاردىڭ ايتقانىن سوزبە-ءسوز كەلتىرىپ وتىرمىن»، - دەيدى شايماردان نۇرىموۆ.
ونىڭ ايتۋىنشا، وسىناۋ كەزەڭدە جاريالانعان بەس الەۋمەتتىك باستاما ەلباسىنىڭ جۇرەگىنىڭ كەڭدىگىن پاش ەتتى.
«بۇل - چەحيالىقتاردىڭ پرەزيدەنتتىڭ جۇمىسىنا بەرگەن باعاسى. شىن مانىندە، ءاربىر باستاما حالىقتىڭ الەۋمەتتىك جاعدايىن جاقسارتۋعا باعىتتالعان. ستۋدەنتتەرگە ارناپ، قوسىمشا 20 مىڭ گرانت بەرىلمەك. دەمەك، بۇرىنعى 50 مىڭ گرانت 70 مىڭ گرانتقا دەيىن ءوستى. بۇل وتە جوعارى كورسەتكىش. بۇنىمەن شەكتەلىپ قالماي، ەڭ الدىمەن ستۋدەنتتەردىڭ باسپاناسى - جاتاقحانا قۇرىلىسى دا ۇمىت قالعان جوق. ءوزىڭىز بىلەتىندەي، 4 جىلدىڭ ىشىندە 75 مىڭ ستۋدەنتكە جاتاقحانا سالىنعالى جاتىر. ول جاتاقحانالار ءۇشىن مىڭداعان جۇمىس ورىن اشىلاتىنىن ەسكەرە بەرىڭىز. ميلليونداعان كىرپىشتىڭ، جۇزدەگەن تەحنيكالاردىڭ جۇمىلدىرىلۋىنىڭ ارقاسىندا جۇمىس ورىندارى كوپتەپ اشىلادى»، - دەيدى ماجىلىسمەن.
شايماردان نۇرىموۆ اسسامبلەيانىڭ بۇل جولعى سەسسياسىندا بەس الەۋمەتتىك باستامانى جۇزەگە اسىرۋدىڭ جولدارى تەرەڭىرەك قاۋزالاتىنىنا سەنىم ءبىلدىردى.
«مەن ءوزىم دەپۋتاتتىقپەن قاتار، ءوزىڭىز دە بىلەتىندەي، ق ح ا كەڭەسىنىڭ مۇشەسى، سونىمەن قاتار قازاقستان ۇيعىرلارىنىڭ ءتوراعاسىمىن. ۇيعىر ەتنومادەني ورتالىعىنىڭ ءتوراعاسى رەتىندە ايتارىم، قازاقستانداعى ۇيعىرلاردىڭ پىكىرى دە - وسى. بۇرىن دا ب ا ق- قا ايتىپ جۇرگەنىمدەي، قازاق جەرىندە قازاقستان ماڭگىلىك بولاتىن بولسا، ول قازاقستان ۇيعىرلارىنىڭ ءتىلى دە، مادەنيەتى دە، ءوزى دە ماڭگىلىك بولادى دەگەن ءسوز. سەبەبى، مۇددە ءبىر. قازاقستاندىق ۇيعىرلار الدىمىزعا قويعان تاپسىرمالاردى جۇزەگە اسىرۋدا سەپتىگىن قوسىپ كەلگەن، الداعى ۋاقىتتا دا قوسا بەرەتىن بولادى. ويتكەنى، الدىمىزعا قويعان ماقسات، تالاپ، ارمان - ءبىر. ماقساتىمىز دا، كەلەشەگىمىز دە ءبىر. مىنە، وسى جايىندا قازاقستان حالقى اسسامبلەياسىنىڭ 26- سەسسياسىندا ايتىلادى»، - دەدى شايماردان نۇرىموۆ.