شاشتارازشى شاش العانى ءۇشىن عانا سوتتالىپ كەتتى مە

استانا. قازاقپارات - ۇلى بريتانيانىڭ لۋتون قالاسىنداعى كورولدىك سوت تاربيەلەۋ ماقساتىندا 10 جاستاعى ۇل بالانىڭ شاشىن تاقىرلاپ الىپ، ارتىنان قىرقىلعان ءوز شاشىن وزىنە جيناتقىزعانى ءۇشىن شاشتارازشىنى 8 اي اباقتىعا جاباتىن ۇكىم شىعاردى.

بۇل جايىندا اعىلشىنداردىڭ Telegraph مەرزىمدى باسىلىمى حابار تاراتتى. تارقاتىپ ايتقاندا، 21 جاستاعى ءابدىراقىم ومار شاشتارازدا قاۋىپتى ۇستارامەن ويناعان بالانى وزىنشە تاربيەلەمەك بولعان ەكەن. ناتيجەسىندە تەمىر توردىڭ ارجاعىنان ءبىر-اق شىقتى. باسى جالتىراپ شىعا كەلگەن ءارى توڭىرەگىندەگىلەردىڭ كۇلكىسىنە قالعان بالانىڭ قاتتى رەنجىگەنى سونداي، دەرەۋ پوليتسياعا شاعىمدانعان. ەكى ايدان كەيىن بۇرىن سوتتى بولماعان شاشتارازشى جىگىت دەنە زاقىمىن كەلتىردى دەگەن ايىپپەن 8 ايعا باس بوستاندىعىنان ايىرىلدى.

سوت القاسى «بالانى قاساقانا قورلادى» دەپ ەسەپتەيدى. پروكۋرور الەكس رەدلي شاشتارازشىنىڭ وسى ارەكەتىمەن بالاعا تەك دەنە زاقىمىن كەلتىرىپ قانا قويماي، سونىمەن بىرگە، پسيحولوگيالىق زيان كەلتىرگەنىن العا تارتتى.

 

islam.kz