اقتاۋلىق وقۋشى ەشكى ءسۇتىن ساتىپ، كاسىبىن باستاعان
«Caspian Start-up 2018» بايقاۋىنىڭ اقتىق كەزەڭىندە 20 جوبا تانىستىرىلىپ، جەڭىمپازدارعا دەمەۋشىلەر مەن كاسىپكەرلەر تاعايىنداعان جالپى كولەمى 1 ميلليون 540 مىڭ تەڭگە قارجىلاي سىيلىق تابىستالدى.
وقۋشىلار مەن كوللەدج ستۋدەنتتەرىنە ارنالىپ وتكىزىلىپ وتىرعان تۇڭعىش ستارتاپتار بايقاۋىن اقتاۋ قالاسىنداعى حيميا- بيولوگيا باعىتىنداعى نازاربايەۆ زياتكەرلىك مەكتەبى مەن ماڭعىستاۋ وبلىستىق ءبىلىم باسقارماسى ۇيىمداستىردى. بايقاۋدىڭ باستى ماقساتى - وقۋشىلار مەن ستۋدەنتتەر اراسىندا جاڭا جوبالاردى تانىستىرۋ الاڭىن قۇرۋ، يننوۆاتسيالىق بىرلەستىكتىڭ الەۋەتىن كورسەتىپ، ونى قولداۋ.
ستارتاپتار بايقاۋىنىڭ فينالىنا ماڭعىستاۋ، اتىراۋ وبلىستارىنان جانە استانا قالاسىنان وقۋشىلار مەن ستۋدەنتتەر قاتىستى. اقتىق سىنعا وتكەن جوبالاردىڭ ءبىرى - ەشكى شارۋاشىلىعى. كوللەدج ستۋدەنتى دينارا ايداربەكوۆا ەشكى ءسۇتىنىڭ ادام اعزاسىنا پايداسىن تەرەڭ ءتۇسىنىپ، بيزنەسكە اينالدىرۋدى كوزدەيدى. قازىردىڭ وزىندە ءسۇت ساتىپ وتىر، ال كەيىن سابيلەرگە ارناپ، انا ءسۇتىن الماستىراتىن ۇنتاق ءوندىرۋدى جوسپارلايدى.
«بۇل جوبانى ىسكە اسىرۋ ءۇشىن 6 ميلليون تەڭگە قاراجات كەرەك. بۇل تەك فيرمانى اشۋعا قاجەتتى سوما. باستاپقىدا 7 ادامدى سوسىن 15 ادامدى جۇمىسپەن قامتيمىن»، - دەيدى ول.
سونداي-اق، جارىستا «تاكسي نيانيا» جوباسى دا قازىلار القاسىنىڭ كوڭىلىنەن شىقتى. نازاربايەۆ زياتكەرلىك مەكتەبىنىڭ وقۋشىسى جۇمىستان قولى تيمەيتىن اتا-انالارعا ءتيىمدى قىزمەت ۇسىنىپ وتىر. ول بالانى بالاباقشاعا، مەكتەپكە، ۇيىرمەگە اپارىپ- اكەلۋدى ىڭعايلى جانە ءقاۋىپسىز جۇزەگە اسىرامىن، - دەيدى. قىزمەتتى ونلاين باقىلاۋعا بولادى. وسى ماقساتتا 1,5 ميلليون تەڭگە قاراجات سۇرايدى.
«الدىمەن 5 كولىكپەن تاسيمىز دەپ وتىرمىز. ءار كولىككە كامەرا ورناتىلادى. سول ءبارىن باقىلاۋدا ۇستايمىز. بالالاردىڭ جاسى 6 ايدان باستاپ، كولكتەردە بالاعا ارنالعان كرەسلو بولادى»، - دەيدى جوبا اۆتورى ازيزا جۇبايەۆا.
جارىس ناتيجەسىندە ماڭعىستاۋداعى تۇيەسۋ جەرىنەن سافاري جاساۋدى ۇسىنعان اقتاۋداعى نازاربايەۆ زياتكەرلىك مەكتەبىنىڭ 11-سىنىپ وقۋشىسى دانا اقۋال باس جۇلدەگە لايىق دەپ تانىلىپ، 300 مىڭ تەڭگە قارجىلاي سىيلىققا يە بولدى. ال، ەكىنشى ورىن ەرىكتى قان تاپسىرۋشىلار بازاسىن جاساقتاۋدى ۇسىنعان استاناداعى فيزيكا- ماتەماتيكا باعىتىنداعى نازاربايەۆ زياتكەرلىك مەكتەبىنىڭ 11-سىنىپ وقۋشىسى قۋانىش امانعاليعا بۇيىردى. وعان 250 مىڭ تەڭگە بەرىلدى. ال، ءۇشىنشى ورىندى اسىق وينىنان ايگىلى مونوپوليا ويىنىن جاساۋدى ۇسىنعان بەينەۋ ليتسەيىنىڭ وقۋشىلارى جەڭىپ الدى. ولارعا 200 مىڭ تەڭگە تابىستالدى.
سونىمەن قاتار، «اتامەكەن» «اتامەكەن» كاسىپكەرلەر پالاتاسىنىڭ ماڭعىستاۋ وبلىستىق فيليالىنىڭ كومەگىمەن جانە وبلىستاعى كاسىپكەرلەردىڭ شەشىمىمەن «Caspian Start-Up 2018» ستارتاپتار بايقاۋىنىڭ فينالىنداعى 4 جوبا قارجىلاندىرىلاتىن بولىپ شەشىلدى.