كوكشەتاۋلىقتار ءبىر اپتا اۆتوبۋستاردا تەگىن جۇرەدى
«كوكشەتاۋ اۆتوبۋس پاركى» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ءاسيا ءشارىموۆانىڭ ايتۋىنشا اتالمىش اۆتوبۋستار قالاداعى № 1، 3، 4، 5، 6، 8، 9، 10، 14، 16 جانە 25 -باعىتتاردا ءبىر اپتا بويى جولاۋشىلارعا قىزمەت كورسەتەدى.
«وسى ارالىقتا جولاۋشىلار تەگىن تاسىمالداناتىن بولادى. بۇل جوبا قالالىق اكىمدىكتىڭ «كوكشەتاۋ قالاسىندا جولاۋشىلار كولىگىن جاڭعىرتۋ» جوباسى شەڭبەرىندە قولعا الىنىپ وتىر. اتالمىش جوبا بويىنشا قولدانىستاعى اۆتوبۋستاردىڭ 40-50 پايىزىن، ياعني، توزىعى جەتكەن كولىكتەردى اۋىستىرۋ قاراستىرىلعان»، - دەيدى سەرىكتەستىك باسشىسى ءا. ءشارىموۆا.
ايتالىق، جوبانى قولعا الماس بۇرىن قالا اكىمدىگى قازىرگى قولدانىستاعى اۆتوبۋستاردىڭ تۇتىنۋشىلىق پايدالانۋ مەرزىمى جانە ەكونوميكالىق مۇمكىندىكتەرىن سارالاپ، قوعامدىق تىڭداۋلار وتكىزگەن بولاتىن. بۇگىننەن باستاپ كوكشەتاۋ قالاسى بويىنشا «ەۆرو-5» تالابىنا ساي ۇلكەن جانە شاعىن اۆتوبۋستاردىڭ ەكىنشى لەگى جولاۋشىلاردى تاسىمالداۋعا كىرىستى. جاڭا كولىكتەر بەينەباقىلاۋ، كونديتسيونەر، سىمسىز ينتەرنەت جەلىسى جانە جىلىتۋ جۇيەسىمەن جابدىقتالعان.
سونداي-اق، مۇمكىندىگى شەكتەۋلى جاندار ءۇشىن كوتەرگىش تە بار.
جالپى، سىناق مەرزىمى ارقىلى بۇل اۆتوبۋستاردىڭ قالاعا جارايتىن-جارامايتىنى انىقتالادى. سودان كەيىن عانا ديللەرلەر مەن اۆتوبۋس شىعارۋشىلار قالالىق اكىمدىكتىڭ شەشىمىمەن قانداي اۆتوبۋستاردىڭ قولدانىسقا قاجەت ەكەنىن انىقتايتىن بولادى.
ەسكە سالا كەتەيىك، وتكەن جىلدىڭ سوڭىندا «لوتوس» ماركالى العاشقى سىناق اۆتوبۋسىمەن كوكشەتاۋ قالاسى اكىمى ەرمەك مىرجىقپايەۆ، اكىمدىك قىزمەتكەرلەرى، قالالىق ءماسليحاتتىڭ دەپۋتاتتارى قالا كوشەلەرىنىڭ بويىمەن ءجۇرىپ كورگەن بولاتىن. بۇل جولى رەسەيدىڭ «ۆولگاباس» جانە «كاۆز-4270» اۆتوبۋستارىنان بولەك قىتايدىڭ «Golden dragon XML6105CR» ماركالى جولاۋشىلار كولىگى سىناقتان وتكىزۋ قولعا الىندى. بۇل اۆتوبۋستاردىڭ بارلىعى گازبەن جۇرەدى.