الماتىلىق ستۋدەنتتەر ءوزى جويىلىپ كەتەتىن ستاقان ويلاپ تاپتى

الماتى. قازاقپارات - الماتى قالاسىندا «تىرەگى سەندەر ەلىمنىڭ» رەسپۋبليكالىق فەستيۆالىنە قاتىسقان ستۋدەنتتەر يننوۆاتسيالىق يدەياسى ءۇشىن ميلليون تەڭگە كولەمىندەگى گرانت ۇتىپ الدى، - دەپ حابارلايدى قازاقپارات.

«تىرەگى سەندەر ەلىمنىڭ» رەسپۋبليكالىق فەستيۆالى الماتى قالاسىندا ءتورتىنشى رەت ءوتتى. بيىل قازاقستاننىڭ ءارتۇرلى ايماقتارىنداعى (الماتى، استانا، پاۆلودار، اقتوبە مەن شىعىس قازاقستان) ۋنيۆەرسيتەتتەردەن كەلگەن 8 توپ فەستيۆال اياسىنداعى «جاس تولقىن» وليمپياداسىندا فيزيكالىق مۇمكىندىكتەرىن كورسەتتى. ايماقتاردان كەلگەن 40 ستۋدەنت 100 مەتر قاشىقتىققا جۇگىرۋ، سەكىرۋ جانە دوپ لاقتىرۋ سىندى سايىستارعا قاتىستى. ودان بولەك، ستۋدەنتتەر شەشەندىك ونەرلەرىن پاش ەتىپ، قىزىقتى بيزنەس-يدەيالارىن تانىستىردى.

فەستيۆالدى ق ر تۇڭعىش پرەزيدەنتىنىڭ قورى جانىنداعى جاس عالىمدار كەڭەسى ۇيىمداستىردى.

«فەستيۆال جاس كاسىپكەرلەر ءۇشىن باستاۋ الاڭىنا اينالىپ ۇلگەردى. مىسالى، سۋلەيمان دەميرەل اتىنداعى ۋنيۆەرسيتەتىنىڭ ستۋدەنتتەرى جۇمىسسىز جاستاردىڭ سانىن قىسقارتۋ ماقساتىندا «jobبەر» موبيلدى قوسىمشاسىن وتكەن جىلى ۇسىنىپ، جەڭىمپاز اتانعان. وسى سىندى جوبالاردىڭ جۇزەگە اسىرىلۋى - فەستيۆالدىڭ باستى كورسەتكىشى»، - فەستيۆالدى ق ر تۇڭعىش پرەزيدەنتىنىڭ قورى جانىنداعى جاس عالىمدار كەڭەسىنىڭ ءتوراعاسىنىڭ ورىنباسارى سۋحراب جاپاروۆ.

ميلليون تەڭگەنىڭ يدەياسى كرەاتيۆتى ءارى سۇرانىستاعى كونسەپتسياعا يە بولۋعا ءتيىس. ستۋدەنتتەر ۇسىنعان جوبالار اراسىندا قالادا گۇل ساتاتىن اۆتوماتتار ورناتۋ، وزىنە-ءوزى قىزمەت ەتەتىن كيىم جۋۋ ورتالىقتارىن اشۋ، يننوۆاتسيالىق اۋانى تازالاۋ قۇرىلعىسىن جاساۋ سىندى يدەيالار بولدى.

فەستيۆال تورەشىلەرىنىڭ شەشىمى بويىنشا، قازاق مەملەكەتتىك قىزدار پەداگوگيكالىق ۋنيۆەرسيتەتىنەن كەلگەن «يدەال» توبىنىڭ «SeedCup» يدەياسى ەڭ ۇزدىك دەپ تانىلدى. ستۋدەنتتەر بيولوگيالىق تۇردە ءوزى جويىلاتىن كوفە ستاقاندارىن شىعارۋدى ۇسىنعان. بۇل يدەيانى جۇزەگە اسىرۋ ارقىلى ستۋدەنتتەر تابيعاتتى ساقتاۋعا ءوز ۇلەستەرىن قوساتىندارىن ايتتى.

     

اۆتور: جولداس ورىسبايەۆ