قۇشاقتاۋدىڭ پايداسى قانداي؟

 استانا. قازاقپارات - ادامداردىڭ ءبىر- بىرىنە دەگەن جىلىلىعى، مەيىرىمدىلىگى، باۋىرمالدىعى ىستىق قۇشاققا ورانعاندا سەزىلەدى.

 قۇشاقتاۋ -  ماحاببات وتىنا داۋىل بولىپ ءتيىپ، جۇرەكتى ەرىكسىز تۋلاتاتىن ارەكەت. ەكى عاشىقتىڭ سەزىمدەرىن نىعايتىپ، ادامعا جاعىمدى اسەر بەرەدى. ءبىراق، قۇشاقتاسۋ تەك قول ۇستاسقان قوس عاشىقتىڭ اراسىندا عانا بولۋى ءتيىس ءىس ەمەس. انا، اكە، جاقىنىڭدى، دوس- قۇربىڭدى قۇشاقتاۋدىڭ ماڭىزى زور. ادام پسيحولوگياسىنا وڭ اسەرىن تيگىزۋمەن قوسا، دەنساۋلىقتى قالىپقا كەلتىرۋدە ۇلكەن ماڭىزعا يە قۇشاقتاسۋ قيمىلى مەديتسينا ماماندارىنىڭ زەرتتەۋى بويىنشا، ءدال قازىرگى داۋىردە داۋرەنى جۇرمەي تۇرعان قاراپايىم عانا ارەكەت. وسىعان قاراپ، قازىرگى قوعامدا ورىن الىپ جاتقان اتىس- شابىستىڭ، قاتىگەزدىكتىڭ سەبەبى ادامدار اراسىندا جىلۋلىقتىڭ، مەيىرىمدىلىكتىڭ جەتىسپەۋىنەن بە دەپ ويلايسىڭ. وسىنداي، ميكروبتاي كوزگە كورىنبەس ماسەلەلەردى شەشۋ ءۇشىن حالىقارالىق قۇشاقتاسۋ كۇنى دە بەكىتىلدى.

21 - قاڭتاردا بىرنەشە ەلدىڭ حالقى ءدال وسى مەرەكەنى سالتاناتتى تۇردە اتاپ وتەدى. امەريكالىق تانىمال پسيحولوگ ۆيردجينيا ءساتيردىڭ جۇرگىزگەن سىناقتارىنىڭ قورىتىندىسى بويىنشا، قاراپايىم ادام قالىپتى ءومىر ءسۇرۋ ءۇشىن كۇندەلىكتى 4 رەت، جاقسى ءومىر ءسۇرۋ ءۇشىن 8 رەت، وتە جاقسى تىرشىلىك ەتۋ ءۇشىن 12 رەت قۇشاقتاسۋ كەرەك ەكەن. 1970 -جىلدان باستاپ ادامنىڭ جۇيكە جۇيەسىندە كەزدەسەتىن ەندورفين اتتى حيميالىق زات عالىمداردىڭ قىزىعۋشىلىعىمەن زەرتتەلە باستادى.

 ەندورفين -  ەيفوريا سەزىمىن شاقىرىپ، اۋىرسىنۋدى باساتىن مورفين تارىزدەس حيميالىق زات. ۆيردجينيانىڭ زەرتتەۋى بويىنشا، ءدال وسى اتاۋلى دۇنيە قۇشىقتاسۋ بارىسىندا كوپ مولشەردە ءبولىنىپ، جۇيكە جۇيەسىن تىنىشتاندىرادى. ادام تەرىسىندە سىرتقى ورتاعا جاۋاپ بەرەتىن ميدىڭ جەكە بەلسەندى بولىگى بار. ەگەر جاس ءسابيدى اتا- انا كىشكەنتاي كۇنىندە ەركەلەتىپ، باۋىرعا باسپاسا وسى ءبىر بولىككە زاقىم كەلىپ، ول جانسىزدانىپ قالادى. وسى كەمشىلىكتىڭ سالدارىنان 7 جاسقا دەيىن اتا- انادان، جاقىننان جىلىلىق سەزىنبەگەن بالادا پسيحولوگيالىق اۋىتقۋلار بايقالادى ەكەن. جاس ۇلعايعان سايىن بۇل دەرت تە اسقىنىپ، تۇبىندە ءتۇرلى قىلمىستىق وقيعالاردىڭ ورىن الۋىنا سەبەپكەر بولادى.

قۇشاقتاسۋدىڭ پايداسى قانداي؟
تىنىش ۇيقىعا سەبەپكەر بولادى؛

 • يممۋندىق جۇيەنى قالىپقا كەلتىرەدى؛

 • قوسىمشا ەنەرگيا، كۇش- قۋات بەرەدى؛

 • ورتالىق جۇيكە جۇيەسىن ىنتالاندىرادى؛

 • جاسارتادى؛

كۇيزەلىستەن ارىلۋعا كومەگىن تيگىزەدى؛

 • ادامنىڭ ءوزىن دۇرىس باعالاۋىنا سەپتىگىن تيگىزەدى؛

 • ىشكى قورقىنىشتان ارىلتادى. قۇشاقتاسۋدىڭ پايداسى جايىندا ەجەلگى شىعىس عۇلامالارى ءوز ەڭبەكتەرىندە بىرنەشە مارتە جازعان. ءوزىن جاقسى كورەتىن سانالى ادام كۇندەلىكتى قۇشاقتاسۋدى ادەتكە اينالدىرۋ كەرەكتىگىن دە ەسكەرتكەن.

Massaget.kz