قازاقستان مەن ق ح ر پارلامەنتشىلەرى ەكىجاقتى ىنتىماقتاستىقتى تالقىلادى

بەيجىڭ. قازاقپارات - بۇگىن قازاقستان پارلامەنتى ءماجىلىسى ءتوراعاسىنىڭ ورىنباسارى گۇلميرا يسيمبايەۆا باستاعان دەلەگاتسيا مۇشەلەرى جالپى قىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى ۆان چەنمەن كەلىسسوز جۇرگىزدى، دەپ حابارلايدى قىتايداعى «قازاقپارات» ح ا ا ءتىلشىسى.

«قىتاي مەن قازاقستان - دوستاس ءارى شەكارالاس ەلدەر جانە دە ءوزارا ءتيىمدى ارىپتەستەر. ديپلوماتيالىق قارىم-قاتىناستار ورناتىلعاننان بەرى 26 جىل بويى ىسكەرلىك بايلانىستار جوعارى دەڭگەيدە جالعاسىپ كەلەدى.

ەكى مەملەكەت باسشىلارى - ق ح ر  ءتوراعاسى شي جينپيڭ مەن قازاقستان پرەزيدەنتى نۇرسۇلتان نازاربايەۆتىڭ جەتەكشىلىگىمەن ەلدەر اراسىندا ەكى جاققا دا ءتيىمدى بايلانىستار نەگىزىندە جان-جاقتى ستراتەگيالىق ىنتىماقتاستىق دامۋدا، ول جاڭا دەڭگەيگە كوتەرىلدى»، - دەدى كەزدەسۋ بارىسىندا ۆان چەن.

ءوز تاراپىنان گ. يسيمبايەۆا ۆان چەندى قىتاي حالىقتىق ساياسي كونسۋلتاتيۆتىك كەڭەسى سەسسياسىنىڭ جانە جالپى قىتايلىق حالىق وكىلدەرى جينالىسىنىڭ تابىستى وتۋىمەن قۇتتىقتادى.

سونداي-اق ول 2012-جىلى قازاقستان پرەزيدەنتى نۇرسۇلتان نازاربايەۆ جانە ق ح ر ءتوراعاسى شي جينپيڭ - 17 رەت، ەكى ەلدىڭ ۇكىمەت باسشىلارى - 8 رەت، پارلامەنت جەتەكشىلەرى 2 رەت كەزدەسكەنىن ەسكە سالدى.

«بيىلعى جىلدىڭ قاڭتار-اقپانىندا قازاقستان مەن قىتاي اراسىنداعى تاۋار اينالىمى 1,7 ميلليارد دوللاردى قۇرادى، بۇل وتكەن جىلدىڭ سايكەس كەزەڭىمەن سالىستىرعاندا 32,3 پروتسەنت جوعارى»، - دەدى گ. يسيمبايەۆا.