وزگەرىس كەرەك: جۇمىستى اۋىستىراتىن ۋاقىتتىڭ جەتكەنىن قالاي انىقتاۋعا بولادى؟
كوپشىلىگىمىز جاعدايدىڭ شيەلەنىسكەنىنە دەيىن بۇعان اسا ءمان بەرمەي كەلۋىمىز مۇمكىن.
تابىستى جۇمىس تۇراقتىلىق پەن جاقسىلىقتىڭ ءبىر نىشانى سەكىلدى. سەن وزگەرىستى قالامايسىڭ، جانە دە اينالاڭداعى بولىپ جاتقان قۇبىلىستارعا ءمان بەرگىڭ كەلمەيدى، ونى كوپ جاعدايدا كورمەيسىڭ دە. جاڭا قىزمەتكەرلەر كەلىپ، بۇرىڭعىلارى كەتىپ جاتادى، جۇمىس جاعدايى دا وزگەرەدى، باسشىلىقتىڭ تاپسىرمالارى كوبەيگەن ۇستىنە كوبەيە تۇسەدى، ال جالاقى ءۇش جىلدىق كولەمىندە وزگەرىسسىز قالىپ قويادى نەمەسە باعالانبايدى. ءسىز جۇمىستى وزگەرتۋ تۋرالى ويىڭىزدى جۇرەك تۇبىنە قۇلىپتاپ تاستايسىز، ويتكەنى كاسىبي بىلىكتىلىگىڭىزدى جوعالتىپ الۋدان، كەرەكسىز بولۋدان قورقاسىز.
پسيحولوگتاردىڭ ايتۋىنشا، مۇنداي كەزدەرى قازىرگى جۇمىسىڭىزدىڭ بارلىق ولقىلىقتارىن ەسەپكە الا وتىرىپ، جاڭا، قاناعاتتاندىراتىن، كوڭىلىڭىزدىڭ قالاۋىنا جاۋاپ بەرەتىن جاڭا جۇمىس تاۋىپ العانىڭىز دۇرىس.
الدىمەن، ەسكى جۇمىسىڭىزدان كەتۋ ءۇشىن، دايىندىق جۇمىستارى كەرەك. جانە دە بۇل دايىندىقتى سوڭعى نۇكتە قويىلعان كەزدە ەمەس، دەنە بەلسەندىلىگىڭىز جوعارى كەزدە، ءارى قارايعى دۇنيەلەرىڭىزدى اقىلعا سالىپ ويلانۋ مۇمكىنشىلىگى بار كەزدە باستاۋ كەرەك. ەندى جۇمىستى وزگەرتۋ قاجەت بولعان دابىلدى كەزەڭدەردى سارالاپ كورەلىك.
جەكە ومىرگە ۋاقىتتىڭ جوقتىعى
ءسىز كاسىبي بىلىكتىلىككە يە بولدىڭىز، جاعدايىڭىزدى جاقسارتتىڭىز، جاقسى قىزمەتتەسىز دەلىك. بىلاي قاراساڭىز، ءبارى ورىندالعان سەكىلدى. الايدا جۇمىس قارقىنى وزگە شارالارعا ۋاقىت تاپپاي قىنجىلتۋدا. ەڭ باستىسى، تاپقان اقشاڭىزدىڭ ءوزىن جويۋعا دا ۋاقىت تاپپايسىز. تاعى ءبىر وقيعا جەلىسى: ءسىز ءوزىڭىزدى ەشقاشان باسشىلىق قىزمەتتە كورمەدىڭىز جانە بولعىڭىز دا كەلمەدى. الايدا جاعداي وزگەرىپ، ءسىز باسشىلىق قىزمەتكە تاعايىندالدىڭىز. ەندى ءسىز ءوزىڭىزدى تەك قانا جۇمىسقا ارناۋداسىز، جاۋاپكەرشىلىكتى سەزىنىپ ءجۇرسىز، ۇيدە دە دەمالۋعا مۇرشاڭىز جوق. سىزگە بۇل ورىن جايسىز بولسا دا، مۇنداي دەڭگەي مەن جاقسى جالاقىدان ايىرىلىپ قالعىڭىز كەلمەيدى. مۇندايدا ادەن ويلانىڭىز. مۇنداي ءومىردى ءدال وسى قارقىندا ءسىز جالعاستىرا بەرگىڭىز كەلە مە؟
مانساپتىڭ وسپەي، ءبىر ورىندا تۇرالاپ قالۋى
قىزمەت تە، جۇمىس تا ءسىزدىڭ كوڭىلىڭىزدەن شىعاتىن كەز بولادى. باستىعىڭىز ريزا، جالاقى جاقسى، كاسىبي مىندەتتەرىڭىز دە قىزىقتى. ءبىراق جىلدار ءوتىپ جاتىر، ءسىزدىڭ ارىپتەستەرىڭىز باسشىلىق قىزمەتتەرگە تاعايىندالىپ جاتىر، ال سىزدە ەشقانداي وزگەرىس كورىنبەيدى. ءسىز بۇدان جوعارى قىزمەتكە تاعايىندالۋعا ءۇمىتتى بولدىڭىز، ال باسشىلىق ءسىزدى نەگىزگى ۇمىتكەرلەردىڭ ءبىرى رەتىندە عانا قاراپ، كۇتپەگەن جەردەن ءسىزدىڭ ورنىڭىزعا باسقا ارىپتەسىڭىز تاعايىندالدى.
مۇنداي كەزدە قابىلەتتى قىزمەتكەرلەردى دۇرىس باعالاي بىلەتىن جاڭا جۇمىس ىزدەستىرۋ ناقتى سەبەپ. سونداي-اق كاسىبي ماماندار مانساپتىق قىزمەتكە يە بولۋ ءۇشىن بىرنەشە جىلدا كاسىبي وزگەرىستەرگە دايىن بولۋ كەرەكتىگىن دە ەسكەرتەدى.
سىزبەن ەشكىمنىڭ ساناسپاۋى، ال تارتىمدى ءارى قىزىقتى جوبالاردى وزگەلەردىڭ ىستەۋى
باسشىلىق قىزمەتتەرگە قىزىقپايسىز، ءوز جۇمىسىڭىزدى ساپالى ورىندايسىز جانە ءوز قىزمەتىڭىز وزىڭىزگە ۇنايدى. ءبىراق سىزگە جايلى كورىنەتىن قىزىقتى شىعارماشىلىق مىندەتتەردى وزگەلەر ورىنداپ جاتادى. سىزگە تەك نەگىزگى جۇمىستار عانا بەرىلەدى.
نەمەسە ودان دا كۇردەلى جاعداي: ءسىز بەدەلگە يە توپتىڭ قۇرامىنداسىز، ول توپ كوپتەگەن كەلىسىمدەر مەن ماڭىزدى مامىلەلەردى جاساۋدا. الايدا ۋاقىت وتە كەلە، بۇل ماڭىزدى شارالار ءسىزىز ۇيىمداستىرىلا باستايدى، ءسىزدىڭ پىكىرىڭىز ەسەپكە الىنباي قالادى.
مۇنداي كەزدە ءوز ۋاقىتىڭىز مەن تالداۋىڭىزدى جاعدايدىڭ نەگە بۇلاي بولعانىن ويلاپ جوعالتپاعانىڭىز ابزال. بۇل جۇمىستىڭ اۋىسۋى قاجەت دەگەن بەلگى دەپ قابىلداعانىڭىز دۇرىس.
جالاقىنىڭ تومەندىگى
سىزگە ۇناعان تاۋاردى ساتىپ الىپ، جاقسى دەمالىس وتكىزىپ، ءوزىڭىزدى جايلى سەزىنۋدە جالاقىڭىز جەتكىلىكتى مە، سونى جاقسىلاپ ويلانىڭىز. ارينە، كەيدە كۇنىنە بىرەر ساعات ۋاقىت الاتىن جۇمىستاردىڭ جالاقىسى تومەن بولاتىنى بەلگىلى. ەگەر جۇمىس بارلىق ۋاقىتىڭىزدى السا، ونىڭ اقىسى دا جاقسى بولۋى ءتيىس.
بۇعان قاراما-قارسى جاعداي: ءسىزدى قىزمەتتىك مىندەتتەردەن گورى جالاقىنىڭ مولشەرى قىزىقتىرۋى ىقتيمال. مۇنداي كەزەڭدە ەرتە مە، كەش پە جالاقى ءسىزدى قاناعاتتاندىرماۋى مۇمكىن. بۇل جۇمىس اۋىستىرۋدىڭ ناقتى بەلگىسى بولىپ ەسەپتەلەدى.
جۇمىستىڭ اۋىسۋىنا اسەر ەتەتىن جەكە جاعدايلار
ەگەر ءسىز جۇمىس ءوتىلى وزگەرىستى قالايتىنىن سەزىنسەڭىز، جاڭا جۇمىس ورنىندا نەنى قالايتىندىعىڭىز تۋرالى نەگىزگى مەجەلەردى كورسەتىڭىز. بالكىم بۇل جاقسى قىزمەت، جوعارى مولشەرلى جالاقى، جاڭا دوستار بولار. ءوزىڭىزدىڭ قالاۋىڭىزعا قاراي جۇمىس قاراستىرىڭىز. ءوز ۋاجىڭىزگە اشىق، سەنىمدى، ادال بولىڭىز.
ەموتسياسىز ويلار
جۇمىستى اۋىستىرماس بۇرىن بۇل نەگىزگى ماقسات ەكەندىگىنە كوز جەتكىزىڭىز. وزگەرىستىڭ قاجەت ەكەنىن سەزىنگىڭىز كەلىپ، دوستاردى دا، جۇمىستى دا، ءومىر ءسۇرۋ ءستيلىن دە اۋىستىرعىڭىز كەلەتىن كەزدەر بولادى. ەگەر مۇنى ويلانباستان ىستەسەڭىز، ومىردەن ءوزىڭىزدى جوعالتىپ الۋىڭىز دا مۇمكىن. سوندىقتان الدەكىمدەرمەن تۇسىنبەستىك ورىن العاننان، بولماسا كوڭىل كۇي سالدارىنان جۇمىستى اۋىستىرۋعا تالپىنباۋ كەرەك. مۇنداي شەشىم ابدەن شەشىلگەن، جەتىلگەن ءارى قالىپتى كۇيدە قابىلدانعان بولۋى ءتيىس.
ەسكى جالىقتىراتىن ءىستى تاستاماي، جاڭا مۇمكىندىكتەر مەن جەتىستىكتەردىڭ بەلەسى كورىنبەسى انىق ەكەنىن ەستەن شىعارماڭىز. سوندىقتان، جۇمىستى اۋىستىرۋ قاجەت ەكەندىگى تۋرالى ناقتى شەشىمگە كەلسەڭىز، سەنىمدى تۇردە كىرىسىڭىز جانە سىزدە ءبارى دە ويداعىداي بولۋى ءتيىس!
دەرەككوز: http://www.menslife.com