كونسۋلدىڭ قولىن الماعانى ءۇشىن مۇسىلمان ايەلىنە ازاماتتىق بەرىلمەدى

الماتى. قازاقپارات - الجير تۋماسىنا لاۋازىمدى مەملەكەتتىك قىزمەتكەردىڭ ۇسىنعان قولىن الماعانى ءۇشىن فرانسيا ازاماتتىعى بەرىلمەيتىن بولدى.

فرانسۋز جىگىتىمەن كوڭىل جاراستىرىپ، شاڭىراق كوتەرگەن مۇسىلمان ايەلدىڭ فرانسيا ازاماتىمەن تۇرمىس قۇرعانىن ەل بيلىگى باستاپقىدا قوستاپ، قولداعان ەدى. الايدا، فرانسيا ءتولقۇجانى تاپسىرۋ كەزىندەگى رەسمي شارادا باتىس پەن شىعىس وركەنيەتى قاقتىعىسىنىڭ كىشىگىرىم كورىنىسىندەي بولعان قولايسىز جايت ورىن الدى.

قالىڭدىق پرەفەكتۋرانىڭ باس حاتشىسىنىڭ جانە وزگەلەردىڭ قۇتتىقتاۋ ءۇشىن سوزعان قولىن المادى. ياعني، يسلامي ادەپ ساقتادى. بۇعان قاتىستى سوت قاۋلىسىندا قالىڭدىقتىڭ «ءدىني سەنىمىنە بايلانىستى» قول الىسپاعانى ايتىلعان. فرانسۋز قوعامى وزدەرىنىڭ ۇلتتىق قۇندىلىقتارىنا قۇرمەت كورسەتپەگەندەرگە، مەيلى سونىڭ ىشىندە ءدىني سەنىمىنە بايلانىستى بولسا دا، ازاماتتىق بەرمەيدى.