قازاقستان ازاماتتارىنىڭ كەيبىر ەلدەرگە كىرگىزىلمەۋىنە نە سەبەپ بولىپ وتىر

استانا. قازاقپارات - قازاقستان ازاماتتارى شەتەلگە شىققاندا كەيدە كۇتپەگەن ءارى كۇردەلى جاعدايلارعا تاپ بولىپ جاتادى.

سونىڭ ءبىرى - بارعان ەلدىڭ اۋەجايىنا كەلگەن كەزدە سول مەملەكەتتىڭ بيلىگى ازاماتتارىمىزدى ءارتۇرلى سەبەپتەرمەن ەلگە كىرگىزۋدەن باس تارتاتىن جاعدايلار بار. مۇنداي كەلەڭسىزدىكتەردىڭ سەبەبى نەدە؟ قازاقپارات ءتىلشىسى وسى ماسەلەگە بويىنشا ق ر سىرتقى ىستەر مينيسترلىگىنە رەسمي ساۋال حات جولداعان ەدى.

ماسەلەن، وسى جىلدىڭ اقپان ايىنىڭ 20 ى كەزىندە كورەيا رەسپۋبليكاسىنا بارعان 20 قازاقستاندىق ازاماتتى جەرگىلىكتى بيلىك سەبەبىن ەش تۇسىندىرمەستەن اۋەجايدا قالۋعا ءماجبۇر ەتكەن. وسى رەتتە مىناداي سۇراقتار تۋىندايدى: الەمنىڭ قانداي مەملەكەتتەرى كوپ جاعدايدا قازاقستاندىقتاردى ەل ىشىنە كىرگىزۋدەن باس تارتىپ جاتادى؟ كوپ جاعدايدا مۇنداي كەلەڭسىزدىكتەرگە قانداي جايتتار سەبەپ بولادى؟

ق ر س ءى م جاۋابىنا سۇيەنسەك، ق ر مەن كورەيا رەسپۋبليكاسى اراسىنداعى كەلىسىمگە (2014 ج. ) سايكەس قازاقستان ازاماتتارى جارامدى جول ءجۇرۋ قۇجاتتارى بويىنشا (ق ر ۇلتتىق پاسپورتىمەن) ۆيزاسىز تۋريستىك ماقساتپەن، ىسكەرلىك ساپارمەن، ەمدەلۋ جانە ساۋىعۋ ماقساتىمەن، جەكە ساپارمەن (تۋىسقاندارىنا، دوستارىنا جانە تانىستارىنا) كورەيا رەسپۋبليكاسىندا 30 كۇن بولا الادى.

«وسى رەتتە، اتالعان كەلىسىمنىڭ ەرەجەلەرى كورەيادا كەلەسى ماقساتتا باراتىن تۇلعالارعا قولدانىلمايدى. ولار: جۇمىسقا ورنالاسۋ، وقۋعا ءتۇسۋ، تۇراقتى تۇرۋ جانە ميسسيونەرلىك ماقسات»، - دەپ جاۋاپ بەردى سۇراققا ق ر س ءى م حالىقارالىق اقپارات كوميتەتى ءتوراعاسىنىڭ مىندەتىن اتقارۋشى ساتىبالدى بۇرشاقوۆ.

قازاقستاننان كورەياعا اتتاناردان بۇرىن كورەيا رەسپۋبليكاسىنىڭ استاناداعى ەلشىلىگىندە نەمەسە وسى ەلدىڭ الماتىداعى باس كونسۋلدىعىندا ءتيىستى ساناتتاعى ۆيزانى الدىن الا رەسىمدەۋ قاجەت. ول بولماعان جاعدايدا كورەيا رەسپۋبليكاسىنىڭ زاڭناماسىنا سايكەس وسى ەلدىڭ كوشى- قون بيلىگى بۇل تۇلعانى ەلگە كىرگىزۋدەن باس تارتۋى جانە دەپورتاتسيالاۋى مۇمكىن.

«كورەيا رەسپۋبليكاسىنىڭ زاڭناماسىنا سايكەس، وسى ەلدىڭ كوشى-قون قىزمەتىنىڭ قىزمەتكەرلەرى مالىمدەلگەن ساپاردىڭ ماقساتى ءىس جۇزىندەگى نيەتىمەن سايكەستىگىن انىقتاۋ ءۇشىن كەز كەلگەن شەتەلدىك ازاماتتاردان اۋەجايدا سۇراۋ جۇرگىزىلەدى. ازاماتتاردىڭ جاۋاپتارىندا ايىرماشىلىق بولعان جاعدايدا ولاردىڭ ەلگە كىرگىزبەۋگە قۇقىلى ەكەنىنە نازار اۋدارۋ كەرەك.

وسىعان وراي، كورەيا رەسپۋبليكاسىنا باراتىن بارلىق قازاقستان ازاماتتارىنا ساپار ماقساتىنا قاراماستان كەرى قايتۋ بيلەتى جانە قوناق ءۇيدى برونداۋ قاعازى بولۋىن، كوشى-قون كارتاسىندا ءوزىنىڭ ساپارىنىڭ ماقساتىن ناقتى كورسەتۋىن، كورەيادا ۋاقىتشا تۇراتىن مەكەن- جايىن، كۇتىپ الۋشى ياكي شاقىرۋشى تۇلعانىڭ (ۇيىمنىڭ) اتى-ءجونى، اتاۋى جانە بايلانىس مالىمەتتەرىن تولىق كورسەتۋگە كەڭەس بەرەمىز. كۇتىپ الۋشى ءسىزدىڭ ۆيزاسىز 30 كۇننەن اسپايتىن مەرزىمدە كورەيا رەسپۋبليكاسىندا زاڭدى بولۋىڭىزعا جانە ۋاقتىلى ەلگە كەرى قايتۋىڭىزعا كەپىل بولۋى ءتيىس. ولاي بولماعان جاعدايدا، كورەيانىڭ كوشى-قون بيلىگى ءسىزدى ەلگە كىرگىزۋدەن باس تارتۋى ىقتيمال»، - دەيدى ساتىبالدى بۇرشاقوۆ.

ق ر س ءى م-نىڭ حابارلاۋىنشا، سونىمەن قاتار قازاقستان ازاماتتارى تۇركيادان بىرنەشە سەبەپپەن شىعارىلىپ جىبەرىلۋدە. سونىڭ ىشىندە ق ر تاراپىنان ىزدەۋدەگى كۇدىكتىلەر تۋرالى اقپارات جىبەرىلگەندە تۇركيانىڭ ءتيىستى ورگاندارى ولاردىڭ ەلگە كىرۋىنە تىيىم سالادى. بۇنداي ازاماتتار پاسپورت باقىلاۋىنان وتكىزىلمەي، كەلگەن مەملەكەتىنە نەمەسە تىكەلەي قازاقستانعا شىعارىلىپ جىبەرىلەدى.

«بۇعان قوسا 2016 -جىلى تۇركيادا توڭكەرىسكە ءساتسىز ارەكەت جاسالعاننان كەيىن ف. گۇلەنشىلەردى تەررورشىلار دەپ تانىعان تۇركيا بيلىگى ولارمەن بۇرىن بايلانىستا (ىستەس، كەزدەسۋ ت. ب. ) بولعان دەگەن جەلەۋمەن كەيبىر ق ر ازاماتتارىن ەلگە كىرگىزبەۋ تۋرالى شەشىم قابىلداپ، ونىڭ سەبەبىن تۇسىندىرمەۋدە. تۇركيانىڭ قۇزىرەتتى ورگاندارى ءتۇرلى سەبەپتەرمەن ەلدىڭ قوعامدىق تارتىبىنە جانە قاۋىپسىزدىگىنە ءقاۋىپ ءتوندىرۋى مۇمكىن تۇلعالاردىڭ كىرۋىنە شەكتەۋ قويا الادى. جالپى، بۇنداي شەشىم قابىلداۋ ءاربىر تاۋەلسىز مەملەكەتتىڭ ءوز قۇزىرەتىندەگى ماسەلە ەكەنىن اتاپ وتەمىز»، - دەلىنگەن جاۋاپتا.

ق ر س ءى م سونداي-اق، قازاقستاندىقتاردىڭ امەريكالىق ۆيزانى قازاقستانداعى ا ق ش ەلشىلىگىنەن نەمەسە باس كونسۋلدىعىنان العان سوڭ، اتالعان ەلگە ەشبىر كەدەرگىسىز كىرە الاتىنى تۋرالى پىكىرلەرى مۇلدەم دۇرىس ەمەستىگىن ەسكەرتەدى. ازاماتتاردىڭ شەكارادان ءوتۋ- وتپەۋى پاسپورت باقىلاۋىنداعى كەدەن جانە ميگراتسيا قىزمەتىنىڭ وكىلىنە بايلانىستى.

«كوبىنەسە، ءبىزدىڭ ازاماتتار تۋريستىك ساناتتاعى ۆيزالاردى العاندارىنا قاراماستان، پاسپورتتىق باقىلاۋدا جۇمىس ىستەۋ ماقساتىمەن كەلە جاتقانىن جەتكىزەدى. وسىدان كەيىن اۆتوماتتى تۇردە دەپورتاتسياعا ۇشىرايدى. سوندىقتان دا پاسپورت باقىلاۋىندا كەدەن جانە كوشى- قون قىزمەتىنىڭ وكىلى كەلۋ ماقساتىنا قاتىستى سۇراق قويعان جاعدايدا، ءبىزدىڭ ازاماتتار بەلگىلى ماقساتتا بەرىلگەن ساناتتاعى ۆيزاعا سايكەس جاۋاپ بەرۋى قاجەت»، - دەيدى.