اقتوبەدە ەڭ سۇلۋ سايگۇلىك انىقتالدى
سايىسقا قاتىسقاندار ءوز-ءوزىن تانىستىرىپ، ات ۇستىندە ونەر كورسەتتى، دەپ حابارلايدى قازاقپارات ءتىلشىسى.
اقتوبەلىكتەر بۇگىن ەرەكشە وقيعانىڭ كۋاگەرى بولدى. ولار اسىل تۇقىمدى، بايگە، كوكپار، تەڭگە ءىلۋ، قىز قۋۋعا ارنالعان اتتاردىڭ ءجۇرىسى مەن شابىسىن تاماشالاپ، شاباندوزداردىڭ شەبەرلىگىن كوردى.
«حالىقتى اتشابارعا جيناۋ، ۇلتتىق سپورتقا دەگەن قىزىعۋشىلىقتى ارتتىرۋ ءۇشىن شارا ۇيىمداستىرامىز. وتكەن اپتادا تاي جارىس، كوكپار بولسا، بۇل اپتادا سۇلۋ سايگۇلىك تاڭدالدى. بۇل جەردە ات، اتتىڭ سۇلۋلىعى، شاباندوزدىڭ كيىمى مەن ات ابزەلدەرى ساراپقا سالىنادى. ءارى ءار قاتىسۋشىعا ءوز ونەرىن كورسەتۋ تالابى قويىلدى. تورەشەلەردىڭ قاتارىندا اتبەگىلەر جانىبەك ءالىشوۆ، اسىلبەك قالدين بار. سايىسقا قاتىسقانداردىڭ باسىم بولىگى ات سپورتى مەكتەبىنىڭ بالالارى مەن سايگۇلىكتەر. جەكە ات باعىپ وتىرعاندار دا قىزىعۋشىلىق تانىتىپ، حالىققا جاقسى كوڭىل كۇي سىيلادى»، - دەدى اقتوبەدەگى ۇلتتىق سپورت تۇرلەرى بويىنشا بالالار جانە جاسوسپىرىمدەر مەكتەبىنىڭ ديرەكتورى باقتيار تولەۋوۆ.
سايىسقا 15 ات قاتىستى. اتتىڭ جەتەكشىلەرى ق ر سپورت شەبەرى ابات ايماعامبەتوۆ، اماندىق قارابايەۆ، تيمۋرحان يمانعالييەۆ، مەيرامبەك اليەۆ، شىڭعىس ەرجانوۆ، نۇرلان دوداي، ازامات سەرعازين.
ال ات ۇستىندەگى شاباندوزداردىڭ بارلىعى ات سپورتى مەكتەبىندە بىرنەشە جىلدان بەرى تاربيەلەنىپ جۇرگەن بالالار مەن جاسوسپىرىمدەر. جارىسقا ءبىر عانا قىز قاتىستى. ول اقتوبەدەگى ات سپورتى مەكتەبىندە دە قىزداردان جالعىز ءوزى جاتتىعادى.
«مەن ات سپورتى مەكتەبىنە 1,5 جىل بۇرىن كەلدىم. قالانىڭ قىزىمىن، بۇرىن اتقا ءمىنىپ كورگەنىم جوق. ءقازىر كوللەدجدە وقيمىن، ماماندىعىم ەسەپشى. ءبىر-بىرىنە سايكەس كەلمەسە دە اتتان ۇزاپ كەتكىم كەلمەيدى. ارمانىم سۇلۋ سايگۇلىك ساتىپ الۋ، كۇتىمىن جاساۋ. ءوز جانىما قىزداردى شاقىردىم. ءبىراق قالا قىزدارى كەلمەدى. قازىر مەكتەپتە قىزداردان جالعىز ءوزىم جاتتىعامىن. اپتاسىنا 2-3 رەت كەتىپ، ۋاقىتىمدا ات ۇستىندە وتكىزەمىن. سايىستا قىز قۋۋدى كورسەتتىك. حالىق وتە جاقسى قابىلداپ، سۋرەتكە ءتۇسىپ جاتتى»، - دەدى سايىسقا قاتىسۋشى ءۇمىت بۇرىمبايەۆا.
سايىسقا 4-8 جاس ارالىعىنداعى سايگۇلىكتەر قاتىستىرىلدى. نۇرتىلەك، ميراج، اقشىل كۇرەڭ، قوزى كۇرەڭ، اقشىل كۇرەڭ قاسقا، ماقپال قارا، تايبۋرىل، ەركەماي تورى، ايشىن تورى، نايزاعاي، التىن تورى، قۇلاگەر، ارداكۇرەڭ، التىن قازىق لاقاپ اتتارىمەن كوكپار، بايگە، تەڭگە ەلۋ، جامبى اتۋ، كوكپارعا باپتالعان سايگۇلىكتەر قاتىستىرىلدى.
سايىس كەزىندە نۇرلان دوداي جەتەكشىلىگىندەگى نايزاعاي مەن التىن تورى ەڭ سۇلۋ سايگۇلىك دەپ تانىلدى. ەكىنشى ورىندا ابات ايماعامبەتوۆتىڭ نۇرتىلەك، ميراج اتى، ءۇشىنشى ورىندا تەمىرحان يمانعاليەۆتىڭ ارعىن كۇرەڭ قاسقا، ماقپال قارا اتتارى كەلدى.
اقتوبە قالالىق سپورت باسقارماسى ارنايى گراموتامەن جانە اقشالاي سىيلىقپەن ماراپاتتادى.
ايتا كەتەيىك، كەلەسى اپتادا يپپودرومدا اساۋ ۇيرەتۋ وتەدى.