الماتىدا مارافون باستالادى
مىڭداعان جەلاياق الماتىلىقتار، ەلىمىزدىڭ تۇكپىر-تۇكپىرىنەن جانە 38 مەملەكەتتەن كەلگەن سپورتشىلار «الماتى مارافوندا» جۇگىرۋگە دايىندالۋدا. قالاداعى جاڭا استانا الاڭىنداعى سورەدە جارىسقا ازىرلىك ءوتىپ جاتىر. مارە سىزىعى دا وسى الاڭدا بەلگىلەنگەن. ساعات 8:00 ەڭ ۇزاق مارافوندىق قاشىقتىققا جۇگىرەتىندەر، جەكە سپورتشىلار مەن ەستافەتاشىلار جارىس جولىنا شىعادى، ولاردان كەيىن جارتىلاي مارافوننىڭ قاتىسۋشىلارى اتتانادى، ساعات 8:25-كە قاراي سوڭعى قاشىقتىق 10 كيلومەتر جۇگىرەتىندەر مەن سكانديناۆ جۇرىسشىلەرى جارىسىن باستايدى. وسى ۋاقىتتا بالالار اراسىندا 3 شاقىرىمعا جۇگىرگەندەر مارەگە كەلەدى.
مارافونعا بايلانىستى قالادا ءبىرقاتار كوشەدە كولىك قوزعالىسى توقتاتىلعان.
«42,2 جانە 21 شاقىرىمدىق جارىستى وتكىزۋ ءۇشىن ءال-فارابي داڭعىلىنىڭ تومەنگى سول جاعى جابىلدى، ال كوشەنىڭ وڭ جاعىندا قوزعالىس اشىق. سونداي-اق شىعىس اينالما جولى دا اشىق، سول ارقىلى اۋەجايعا بارۋعا بولادى. ساين كوشەسىنىڭ شىعىس جاعى جابىلادى، باتىس جاعىمەن قالانىڭ تومەنگى جانە جوعارى بولىگىنە بارۋعا جول اشىق. اباي كوشەسىنىڭ وڭ جاعى مەن جوعارى جاعى جابىلادى. تومەنگى جانە سول جاعىمەن جۇرە بەرۋگە بولادى. ءۇش كوشە - بايتۇرسىنوۆ ابايدان ساتپايەۆ كوشەسىنە دەيىن، ساتپايەۆ بايتۇرسىنوۆتان نازاربايەۆ داڭعىلىن دەيىن، جانە نازاربايەۆ داڭعىلى ساتپايەۆتان باستالىپ ءال- فارابيعا شەيىن تولىقتاي جابىق»، - دەدى «الماتى مارافون» جوباسىنىڭ مەنەدجەرى ارتەم ياكۋپوۆ.
مارافون قاشىقتىعىن ەڭسەرۋگە 6 ساعات بەرىلەدى. باستالۋى ساعات 8:10-دا.
مارافون اياقتالعان سوڭ كۇندىز ساعات 2 دە جولدار اشىلىپ، ونداعى كولىك قوزعالىسى قالپىنا كەلتىرىلەدى.
«10 شاقىرىمدىق قاشىقتىق ءۇشىن جوعارىدا اتالعان كوشەلەرگە قوسىمشا شاشكين، تيميريازيەۆ پەن ماناس كوشەلەرى تولىق جابىلدى. ويتكەنى كوشە تار، وندا بولەتىن ورتاداعى جولاق جوق. بۇل جەردە ادام وتە كوپ جۇگىرەدى. اتالعان قاشىقتىققا 10 مىڭ ادام تىركەلگەن»، - دەيدى ارتەم ياكۋپوۆ.
10 ك م قاشىقتىققا جۇگىرەتىندەرگە 2 ساعات ۋاقىت بەرىلەدى، باستالۋى ساعات 8:30.
ايتا كەتەرلىگى، شاشكين، تيميريازيەۆ پەن ماناس كوشەلەرىندەگى قوزعالىس ساعات 10:30-دا اشىلادى.
بالالار جۇگىرەتىن قاشىقتىق ءۇشىن قوسىمشا كىشى جەلتوقسان مەن جەلتوقسان كوشەسىنىڭ تيميريازيەۆتەن ساتپايەۆقا دەيىنگى ارالىعى جابىلعان.
