ۇل ءوسىرىپ وتىرساڭىز
وعان وقۋدان گورى سپورت ماڭىزدىراق دەپ سانايتىندار دا بار. دەگەنمەن، ۇلدىڭ تاربيەسى دە بولاشاقتىڭ كەپىلى ەكەنىن ەستەن شىعارماعان ءجون. ۇل بالا تاربيەسىندە ەسكەرۋگە تۇرارلىق ءۇش كەزەڭ بار:
ءبىرىنشى كەزەڭ - تۋعاننان 6 جاسقا دەيىن: ولار وزدەرىنە كوڭىل بولگەندى جاقسى كورەدى. الەمدى باقىلاپ، ولاردى زەرتتەگەن ۇنايدى. ۇشقان كوبەلەكتەن باستاپ، جەردە جاتقان جانسىز تاستىڭ وزىنە قىزىعۋشىلىق تانىتادى. بۇل كەزەڭ - ەڭ ماڭىزدى. ويتكەنى، بالانىڭ ويلاۋ جۇيەسى وسى ۋاقىتتا قالىپتاسادى. ولاردىڭ «نەگە؟ » دەگەن سۇراعىنا جاۋاپ بەرۋدەن قاشپاڭىز. ويتكەنى، ءبىر رەت جاسالعان تىيىم ونىڭ ويىندا «سۇراۋ دۇرىس ەمەس» دەگەندى قالىپتاستىرىپ، ىشتەي تىنۋعا اكەلەدى. قىز بالا پىسىقتاۋ بولاتىنى انىق، ال ەر بالا اتا- انانىڭ نازارىن كەرەك ەتەدى. كىشكەنتاي ۇلىڭىزبەن ءجيى سويلەسىڭىز، ويتكەنى قارىم- قاتىناس داعدىسى ەر بالادا باياۋ قالىپتاسادى. بالا باقشاسىنا ءۇش جاستان اسقاننان سوڭ بەرگەن دۇرىس. سەبەبى، بالا كەزىندە جاقىنىنان 8 ساعاتقا قول ءۇزۋ بالا بويىندا كۇيزەلىستى تۋدىرادى. عالىمداردىڭ ويىنشا، ەر بالانىڭ پسيحولوگياسى كۇيزەلىسكە توتەپ بەرە المايدى. ولار اۋرۋشاڭ نەمەسە ىزاقور بولىپ وسەدى.
ەكىنشى كەزەڭ - 6 جاستان 13 كە دەيىن: « 6 جاستان 13 جاسقا دەيىن قۇلىنداي جۇمسا.. .» . بۇل ءسوز ەستەرىڭىزدە شىعار. ءيا، بالانى ەڭبەككە باۋليتىن شاق وسى ساتتەن باستالادى. ەر ادامنىڭ اقساۋساق بولعانى دۇرىس ەمەس. ونىڭ قولىنان كوپ نارسە كەلۋى ءتيىس. بۇل كەزدە اكەنىڭ ءرولى - ماڭىزدى. ول اۋلانى جيناعاندا قاسىنا بىرگە سەرىك ەتىپ، جەڭىل تىرلىككە بالانى جۇمساپ ۇيرەتسە، ونىڭ بولاشاقتا كوپ نارسەنى ءوز ەركىمەن جاسايتىنى انىق. بالاعا بىلاي ىستە دەپ سوزبەن ۇيرەتۋ دۇرىس ەمەس. بالاعا كورسەتىپ ءجۇرىپ ۇيرەتۋ كەرەك. بۇل ۋاقىتتا بالاعا از كوڭىل بولىنسە، بالا ۇرلىق جاساپ، توبەلەسىپ اتا- انانىڭ نازارىن وزىنە اۋدارتۋدىڭ وزگە جولىن ىزدەي باستايدى. بۇل كەزەڭدە بالا بارلىق كورگەنىن، ەستىگەنىن قاعىپ الادى.
ءۇشىنشى كەزەڭ - 14 جاستان باستاپ.. . بىرنەشە جىل بويىنا ونى جۇمساپ شىنىقتىردىڭىز. ەندى ونىمەن دوس رەتىندە سىرلاسىڭىز. ونىڭ جاعدايىن سۇراڭىز، بولاشاققا جوسپارىن سۇراڭىز. ەگەر دۇرىس ۇيرەتسەڭىز، بۇل ۋاقىتتا بالا وزىدىگىنەن اۋلانى تازالاپ، وزدىگىنەن ءۇي تىرلىگىنە جاۋاپ بەرە باستايدى. سوندىقتان، بۇل ۋاقىتتا داۋىس كوتەردىڭ نەمەسە ونى سوگۋدىڭ قاجەتى جوق. كەرىسىنشە، وتپەلى كەزەڭگە اياق باسقان بالاڭىزدى وزىڭىزدەن الشاقتاتىپ الاسىز. ونىڭ ورنىنا، ءوزىڭىزدىڭ بالالىق شاعىڭىزدى، ستۋدەنت كەزدە باسىڭىزدان وتكەرگەن قىزىقتى شاقتاردى ايتىپ وتىرىڭىز. ەندى وعان ۇلكەن جاۋاپكەرشىلىك مىندەتى جۇكتەلگەنىن ءسوز اراسىندا قوسىپ قويىڭىز. بۇل بالانىڭ وزىنە دەگەن سەنىمىن ارتتىرادى. بالاعا تاڭداۋ مۇمكىندىگىن بەرۋدى دە ۇمىتپاڭىز. ادامنىڭ ىشىندەگى ەڭ ناشارى - جاتىپ ىشەر ادام. ەر ادام ەڭبەككە قۇشتار بولۋى، قولىنان ءىس كەلۋى ءتيىس. سونىمەن قاتار، «توعىز ءبىتىرىپ، كەتسە جەتەدى. ۇل بالاعا وقۋدىڭ نە كەرەگى بار؟ » دەگەن ويدان دا اۋلاق بولىڭىز. ويتكەنى، بولاشاقتا شاڭىراقتى ۇستاپ قالاتىن - ۇل بالا مەن ونىڭ تاربيەسى.
Massaget.kz