قوستانايلىقتار «كىتاپحانا تۇنىنە» جينالدى

 قوستاناي. قازاقپارات - قوستانايداعى وبلىستىق كىتاپحانادا «رۋحاني جاڭعىرۋ» باعدارلاماسى اياسىندا «كىتاپحانا ءتۇنى» شاراسى وتكىزىلدى، دەپ حابارلايدى قازاقپارات.

ل. تولستوي اتىنداعى وبلىستىق امبەباپ عىلىمي كىتاپحاناسى ديرەكتورى داريعا دۇيسەبايەۆانىڭ سوزىنشە، بۇل شارا وسىمەن ءتورتىنشى رەت ۇيىمداستىرىلدى.

 «وقىرماندارىمىز ءۇشىن ەرەكشە «كىتاپحانا ءتۇنى» ءداستۇرلى جوباعا اينالدى. بۇل اۋقىمدى شارا جىلدان جىلعا جالعاسادى. نەگىزگى ماقساتى - وقىرمانداردى كىتاپقا جاقىنداتۋ، وقۋعا شاقىرۋ، سونىمەن قاتار ءبىزدىڭ قىزمەتكەرلەرگە جاڭا قىرىنان تانىلۋىنا مۇمكىندىك بەرۋ. مۇراعاتتا ساقتالىپ تۇرعان كونە جادىرگەرلەرمەن جۇرتشىلىقتى تانىستىرۋ. سەبەبى، ول جەرگە باسقا ۋاقىتتا وقىرمان تۇرماق، ءوزىمىزدىڭ قىزمەتكەرلەرگە دە كىرۋگە بولمايدى. بيىلعى «كىتاپحانا تۇنىندە» ەرتەگى كەيىپكەرلەرى مەن سيقىرشىلار، باتىرلار مەن بالگەرلەر ونەر كورسەتەدى» ، - دەيدى داريعا دۇيسەبايەۆا

وقىرماندار ءتۇن اۋعانشا كىتاپحانانىڭ مۇراعات قويمالارىن ەمىن- ەركىن ارالاپ، مەكەمە قىزمەتكەرلەرى دايىنداعان ءتۇرلى توسىن سىيلارعا كۋا بولدى. كىتاپحانىڭ ءۇش قاباتىندا دا ءارتۇرلى شەبەرلىك مەكتەپتەرى مەن كىتاپ كورمەلەرى ءوتتى.

 

«عالامتور جايلاعان زامان وقىرمانداردىڭ بەلسەندىلىگىن تومەندەتكەنى شىندىق. سوندىقتان وسىناداي تاعىلىمدى شارالار تاريحي تانىمىمىزدى كەڭەيتەتىنى انىق. بۇگىن كىتاپحانادا بۇرىن بولا بەرمەيتىن مۇمكىندىكتەرگە قول جەتكىزدى. سيرەك كىتاپتار قورىنا كىرىپ، ولكەنىڭ باي تاريحىمەن تانىستىم. مۇنىڭ ءوزى ءبىر عانيبەت!» - دەدى بولات كوركەمبايەۆ ەسىمدى وقىرمان.

 

ءان، بيمەن ارلەنگەن كەشكە كەلۋشىلەر ءتۇرلى دەرەكتەرگە قانىق بولدى. ال اقىندار رۋحتى ولەڭدەرىن وقىسا، سۋرەتشىلەر كىم ۇزدىكتى انىقتادى. وقىرمانداردىڭ كوبى روبوت تەحنيكاسى سەكتسياسىنا كەلىپ، جاس ونەرتاپقىشتاردىڭ تۋىندىلارىن تاماشالادى.

 

ايتا كەتەيىك، اتالعان ءىس- شارا تۇنگى ساعات 01:00 گە دەيىن جالعاستى.