ەليزابەت تۇرسىنبايەۆا قىزىلوردادا شەبەرلىك ساباعىن وتكىزدى

قىزىلوردا. قازاقپارات - قىزىلوردا قالاسىنداعى «مۇز سارايى» سپورت كەشەنىندە بەلگىلى مانەرلەپ سىرعاناۋشى ەليزابەت تۇرسىنبايەۆا جەرگىلىكتى جاس ورەندەرگە شەبەرلىك ساباعىن وتكىزدى، دەپ حابارلايدى قازاقپارات ءتىلشىسى.

سىر ءوڭىرىنىڭ ساڭلاعى بۇگىنگى كۇنگە دەيىن 4 دۇركىن قازاقستان چەمپيونى اتاعىنا يە بولدى. سونداي-اق، بيىل وڭتۇستىك كورەيادا وتكەن قىسقى وليمپيادا ويىندارىندا ەل نامىسىن قورعاپ قايتتى. ول ەلىمىزدە مانەرلەپ سىرعاناۋ سپورتىنان قىزدار اراسىنان مۇنداي جوعارى دەڭگەيدە سىنعا ءتۇسىپ جۇرگەن ساناۋلى سپورتشىنىڭ ءبىرى سانالادى.

شەبەرلىك ءدارىسى بارىسىندا ول جاس ورەندەرگە مانەرلەپ سىرعاناۋدىڭ قىر-سىرىن ۇيرەتتى. سوڭعى جىلداردا قىزىلوردادا دا سپورتتىڭ بۇل ءتۇرى كەڭىنەن قانات جايىپ كەلەدى.

«مەن جاس جەتكىنشەكتەرمەن جۇزدەسۋ بارىسىندا ولاردىڭ اتالمىش سپورتقا ىنتا-ىقىلاسى جوعارى ەكەنىن اڭعاردىم. ولار كەلەشەكتە حالىقارالىق ارەنالاردا قازاقستاندى الەمگە تانىتقىسى كەلەدى»، - دەيدى ول.

ۇستىمىزدەگى جىلدىڭ قىركۇيەك ايىنان باستاپ ەليزابەت حالىقارالىق جارىستارعا دايىندىعىن باستايدى. كەلەر جىلى ونى رەسەيدىڭ كراسنويارسك قالاسىندا وتەتىن قىسقى ۋنيۆەرسيادا ويىندارى مەن جاپونيادا الاۋى جاعىلاتىن الەم چەمپيوناتى سەكىلدى ءدۇبىرلى دودالار كۇتىپ تۇر. قىزىلوردالىق سپورتشى مۇنداي جارىستاردا تۇڭعىش رەت باق سىنايدى.