مەن ءوزىم قالاعان ايەلگە ۇيلەندىم: باۋىرجان مومىش ۇلى جايلى ەستەلىك
سىنىققا سىلتاۋ ىزدەگەن بەلسەندىلەر ونى ءار ساققا جۇگىرتىپ، قالايدا باۋكەڭدى تۇقىرتۋ ءۇشىن تۇس-تۇستان جامىراستى. اسىرەسە، دوسپىز دەپ قولتىعىنا كىرىپ، جىلماڭداپ جۇرەتىن كەيبىر قاراۋ نيەت ارىپتەستەرى اقيلانا ەلىرىپ، گازەت-جۋرنالداردا جارىسا جازىپ، ۋلاپ-شۋلادى.
قاراپ تۇرساڭ، ول شىركىندەر كىل مورالدىق جاقتان تاپ-تازا، قيعاشتىققا جانى قاس، اقىل ايتۋعا شەبەر ابىز شەتتەرىنەن. جاساعان توقتامدارى - باۋكەڭنىڭ ماسەلەسىن جازۋشىلار وداعىنىڭ پارتبيۋرو ماجىلىسىندە قاراپ، پارتيادان شىعارىپ (وداق مۇشەلىگىنەن الاستاۋ) قاتاڭ جازالاۋ (بوپتى). وداققا ءبىر شاقىرادى، ەكى شاقىرادى، ون شاقىرسا دا، ءبىراق، باۋكەڭ باراتىن با ەدى. بارماق تۇگىل، حابارلاسقانداردى جەتى اتاسىنا دەيىن سىباپ، ماڭىنا جولاتپاپتى. ارينە، بۇل جايلى و ك- كە تىنىمسىز جەتىپ جاتادى. ول كەزدە مەن سوندا سەكتور مەڭگەرۋشىسى ەدىم. بىردە جاندىلدين شاقىردى. قاشاندا قاتال، سۇستى كورىنەتىن نۇرەكەڭنىڭ بۇل جولى ءوڭى جىلى، قاباعى اشىق، كوزدەرى كۇلىم قاعادى.
- سولاي دا سولاي، جازۋشىلار وداعى بىزدەن جاۋاپ كۇتىپ وتىر، - دەپ ءمان-جايدى قىسقاشا ءتۇسىندىردى دە: - سەن بارىپ مەنىڭ اتىمنان باۋكەڭمەن سويلەس، جاۋابىن تەك ماعان ايت، - دەدى بەتىمە جايراڭداي قاراپ.
اپىراي، قيىن بولدى-اۋ دەيمىن وزىمشە. قالاي بارامىن، نە دەپ بارامىن، ەسىكتەن كىرمەي جاتىپ قۋىپ شىقسا قايتپەكپىن. تۇسىنەمىن، باۋكەڭە سوزدەرى وتپەگەن وداق باسشىلارىنىڭ ەندىگى ءۇمىتى - ورتالىق كوميتەت. ەگەر و ك بۇيىرسا، باۋكەڭ جينالىسقا كەلەدى دەپ ويلايتىنى انىق.
امال جوق، باۋكەڭە تەلەفون سوعىپ، «سىزگە بارايىن دەپ ەم»، - دەدىم. «كەلە بەر»، - دەدى گۇر ەتىپ. - «ءۇيدى تابا الاسىڭ با؟». - «تابامىن».
باردىم. ەسىكتى ايداي سۇلۋ جاس ايەل اشتى. زالدان «مۇندا كەل» دەگەن ءزىلدى داۋىس ەستىلدى. كىردىم. باۋكەڭ كرەسلودا وتىر ەكەن. قول بەرىپ امانداستىم.
- سەن سولداتسىڭ، - دەدى باۋكەڭ. - پارتيانىڭ سولداتىسىڭ. سولدات بۇيرىقتى ورىنداۋى كەرەك. كەلگەنىڭ دۇرىس، قويار كىنام جوق. بىلەمىن، جاندىلدين سەنەن جاۋاپ كۇتىپ وتىر. ەندەشە، وعان بىلاي دەپ ايتىپ بار: « مەن ءوزىم قالاعان ايەلگە ۇيلەندىم». ءدال وسىلاي دەپ ايتتى دە. بولدى! كرۋگوم! شاگوم مارش!
جەكسەمبەك ەركىمبەكوۆ
Stan.kz