گرۋزياعا دەمالۋعا باراتىن قازاقستاندىقتاردىڭ سانى ارتىپ كەلەدى

استانا. قازاقپارات - قازاقستاننان گرۋزياعا دەمالۋعا باراتىن تۋريستەردىڭ سانى جىلدان جىلعا ارتىپ كەلەدى.

بۇل تۋرالى قازاقپارات ءتىلشىسىنىڭ جولداعان رەسمي ساۋالىنا جاۋاپ بەرگەن ق ر س ءى م حالىقارالىق اقپارات كوميتەتى ءتوراعاسىنىڭ مىندەتىن اتقارۋشى ساتىبالدى بۇرشاقوۆ حابارلادى.

ناقتىراق ايتقاندا، ق ر سىرتقى ىستەر مينيسترلىگىنەن 2017-جىلدىڭ قورىتىندىسى بويىنشا قازاقستاندىقتار دەمالۋعا باراتىن الەم مەملەكەتتەرىنىڭ بەستىگى سۇرالعان بولاتىن. س ءى م بۇل سۇراق بويىنشا ق ر مادەنيەت جانە سپورت مينيسترلىگىنىڭ تۋريزم يندۋسترياسى كوميتەتى جاۋاپتى ەكەنىن ايتا كەتكەنىمەن، قولدا بار مالىمەتتەرىمەن بولىسكەن.

«قولدا بار اقپاراتقا سايكەس، قازاقستاندىقتار نەگىزىندە ءداستۇرلى تۋريستىك ەلدەرگە دەمالۋعا بارادى. ونىڭ ىشىندە ت م د ەلدەرى، تۇركيا، ب ا ءا، قىتاي، مىسىر، باتىس ەۋروپا، وڭتۇستىك-شىعىس ازيا ەلدەرى جانە ت. ب. سونداي-اق، 2017-جىلى 99463  ق ر ازاماتى بىرىككەن اراب امىرلىكتەرىنە بارىپ قايتقان»، - دەپ جاۋاپ بەردى ق ر س ءى م وكىلى.

ساتىبالدى بۇرشاقوۆ حابارلاعانداي، ت م د ەلدەرى ىشىندە گرۋزياعا دەمالۋعا باراتىنداردىڭ سانى كوبەيگەن كورىنەدى.

«گرۋزياعا تۋريستىك ماقساتتا كەلەتىن قازاقستان ازاماتتارىنىڭ سانى جىلدان جىلعا وسۋدە. مىسالى، گرۋزيا تۋريزم جونىندەگى ۇلتتىق اگەنتتىگىنىڭ اقپاراتىنا سايكەس، 2017-جىلى گرۋزياعا 56765 قازاقستاندىق تۋريستەر بارعان. بۇل كورسەتكىش 2016-جىلعى كورسەتكىشتەرمەن سالىستىرعاندا (48849 ادام) 16,2 پايىزعا نەمەسە 7916 ادامعا وسكەن»، - دەلىنگەن جاۋاپتا.