قازاقستان مەن فينليانديا كولىك سالاسىنداعى ىنتىماقتاستىقتى نىعايتادى
وتىرىس قازاقستان رەسپۋبليكاسى ينۆەستيتسيالار جانە دامۋ مينيسترلىگى ترانزيتتى جانە كولىك لوگيستيكاسىن دامىتۋ دەپارتامەنتىنىڭ ديرەكتورى سەرىك باشىموۆتىڭ جانە فينليانديا رەسپۋبليكاسى كولىك مينيسترلىگى دامۋ دەپارتامەنتىنىڭ ديرەكتورى مۋرتو ريستونىڭ ءتوراعالىق ەتۋىمەن ءوتتى.
تاراپتار ەكى ەلدىڭ كولىك ساياساتىنىڭ اعىمداعى مىندەتتەرى جانە باسىمدىقتارى تۋرالى اقپاراتپەن الماستى. قازاقستاندىق تاراپ قىتاي - ەۋروپا باعىتىندا كونتەينەرلىك تاسىمالدار كولەمىنىڭ وسكەنىن ايتتى. فين تاراپى قازاقستاننىڭ كوۋۆولا - بۋسلوۆسكايا - التىنكول - سيان باعىتىندا كونتەينەرلىك پويىزبەن تاسىمالداۋدى جانداندىرۋعا ماڭىزدى ءرولىن اتاپ ءوتتى.
سونداي-اق، ولار كولىك سالاسىنا ساندىق فورماتتاعى تەحنولوگيالاردى ەنگىزۋ تاجىريبەسىمەن ءبولىستى. تاراپتار ءترانزيتتى كونتەينەرلىك تاسىمالدار كورسەتكىشتەرىنىڭ وسكەنىن تىلگە تيەك ەتتى. 2017-جىلعى قاراشادان بەرى سيان (ق ح ر) - كوۋۆولا (فينليانيديا)، كوۋۆولا (فينليانديا) - سيان (ق ح ر) ، ۆيارتسيليا (فينليانديا) - كورلى (ق ح ر) باعىتتارى بويىنشا 30 كونتەينەرلىك پوەزدار جىبەرىلدى.
قازاقستاندىق تاراپ ەكى ەلدىڭ ۇقساس كليماتتىق جاعدايلارىن ەسكەرە وتىرىپ، ودان ءارى فينليانديا تاجىريبەسىن زەردەلەۋگە قىزىعۋشىلىق تانىتتى جانە دە تاراپتار وسى باعىتتاعى جۇرگىزىلگەن جۇمىستار تۋرالى اقپارات الماسۋدى جالعاستىرۋعا كەلىستى. سونىمەن قاتار، ازاماتتىق اۆياتسيا سالاسىنداعى ىنتىماقتاستىق پەرسپەكتيۆالارىن تالقىلادى. فين تاراپى استانا-حەلسينكي تىكەلەي رەيسىن تۇراقتى نەگىزدە ورىنداۋعا قىزىعۋشىلىق ءبىلدىردى.
سونداي-اق، كەزدەسۋ اياسىندا اعىمداعى جىلدىڭ مامىر ايىندا قول قويۋ جوسپارلانعان اۋە قاتىناسى تۋرالى «كولدەنەڭ ەلەمەنتتەرىمەن» جاڭا كەلىسىمنىڭ ءماتىنى پىسىقتالدى.
جالپى، قازاقستان مەن فينليانديا اراسىندا كولىك سالاسىنداعى ەكىجاقتى قارىم-قاتىناستاردا وڭ سەرپىن بار ەكەنىن كورسەتتى. 2017-جىلى قازاقستاننىڭ تەمىر جول كولىگىمەن ترانزيتتىك جۇك تاسىمالداۋ كولەمى 60,22 مىڭ توننانى قۇرادى، ياعني 2016-جىلمەن سالىستىرعاندا 31,69 مىڭ تونناعا ۇلعايدى (28,53 مىڭ توننا).