استانادا فۋتزالدان حالىقارالىق تۋرنيرى باستالدى
استانا قالاسىندا اۋەسقويلار مەن كاسىبي توپتار اراسىنداعى جارىس 2002-جىلدان بەرى ءوتىپ كەلەدى. ۇيىمداستىرۋشىلاردىڭ ايتۋىنشا، بۇعان دەيىن جارىسقا ەلوردالىق كوماندالار عانا قاتىسقان، ءبىراق جىل سايىن تۋرنيرگە دەگەن قىزىعۋشىلىق ارتىپ كەلەدى جانە كوماندالاردىڭ دەڭگەيى دە وسكەن. بۇگىنگى كۇنى «YELEU CUP» اۋەسقويلار اراسىندا سىيلىق قورى 1100000 تەڭگەنى قۇرايتىن ەڭ جوعارعى دەڭگەيلى تۋرنيرلەردىڭ بىرىنە اينالدى.
بيىلعى جارىسقا استانا، الماتى، اقتوبە، اقتاۋ، كوكشەتاۋ، پاۆلودار، پەتروپاۆل جانە قازاقستاننىڭ باسقا وڭىرلەرىنىڭ چەمپيوندارى مەن جۇلدەگەرلەرى، سونداي-اق رەسەي مەن قىرعىزستاننىڭ جوعارعى ليگاسىنىڭ كوماندالارى قاتىسادى. تۋرنيردە بارلىعى 15 كوماندا باق سىناماق. قازىرگى چەمپيون - اقتوبەدەن كەلگەن «ءىنجۋ» كومانداسى.
جەڭىمپاز كوماندانى بيىل پراگادا وتەتىن فۋتزال بويىنشا چەمپيوندار ليگاسىنىڭ جولداماسى كۇتىپ تۇر.