كاستامونۋ قالاسىندا «تۇركى الەمىندەگى جىل ادەبيەتشىسى» انىقتالدى
شارا بارىسىندا ازەربايجان جازۋشىلار وداعىنىڭ ءتوراعاسى انار ىرزايەۆقا تۇركسوي- دىڭ قۇرمەتتى مەدالى تابىستالىپ، سونىمەن قاتار «تۇركى الەمىندەگى جىل ادەبيەتشىسى» اتاندى، دەپ حابارلايدى قازاقپارات ءتىلشىسى.
(تۇركسوي) ۇيىمداستىرعان تۇركى الەمىنىڭ ادەبي جۋرنالدارىنىڭ توعىزىنشى كونگرەسى 16 حالىق مەن قوعامداستىقتىڭ 28 ادەبيەتشىسىنىڭ باسىن قوستى. ولاردىڭ ىشىندە ازەربايجان، قازاقستان، قىرعىز رەسپۋبليكاسى، وزبەكستان، تاتارستان، باشقۇرتستان، قىرىم، گاگاۋزيا (مولدوۆا) ، يراك، يران، كوسوۆو، ماكەدونيا، سولتۇستىك كيپر ەلدەرىنىڭ اقىن- جازۋشىلارى بار.
«وزدەرىڭىز بىلەتىندەي، تۇركى الەمىنىڭ ونەرى مەن مادەنيەتىنە زور ۇلەس قوسقان كورنەكتى قايراتكەرلەردىڭ ەڭبەگىن ەلەي وتىرىپ، تۇركسوي ولاردىڭ قۇرمەتىنە ەستەلىك جىلدىڭ جاريالانعانىن مالىمدەدى. وسى جىلى مۇنداي ماڭىزدى داتالاردىڭ قاتارىندا ءازىربايجان اقىنى قارا قارايەۆتىڭ 100 جىلدىعى، قازاق اقىنى ماعجان جۇمابايەۆتىڭ 125 جىلدىعى جانە قىرعىز جازۋشىسى شىڭعىس ايتماتوۆتىڭ 90 جىلدىعى ەنىپ وتىر» ، - دەدى تۇركسوي- دىڭ باس حاتشىسى دۇيسەن قاسەيىنوۆ.
سونىمەن قاتار، ول قايتىس بولعان كلاسسيكتەرگە قۇرمەت كورسەتۋمەن قاتار، زامانداستارىمىزدىڭ شىعارماشىلىعى مەن دارىنىن لايىقتى باعالاۋ كەرەكتىگىن اتاپ ءوتتى. تۇركسوي باس حاتشىسى وسى رەتتە تىرىسىندە اتى اڭىزعا اينالعان ازەربايجان جازۋشىلار وداعىنىڭ ءتوراعاسى انار ىرزايەۆتى اتاپ ءوتىپ، كونگرەستىڭ اشىلۋىندا وعان تۇركسوي- دىڭ قۇرمەت گراموتاسى تابىستالدى.
انار ىرزايەۆ كاستامونۋعا تۇڭعىش رەت كەلگەنىن مويىندادى.
«مەن كاستامونۋدان تۇركى الەمىنىڭ نۇرىن كوردىم، مۇندا بۇكىل تۇركيانى كورۋگە بولادى. بۇل جەردە تۇركيانىڭ بارلىق نىشاندارىن، ونىڭ بارلىق تابيعي جانە مادەني مۇرالارىن سەزىندىم» ، - دەدى ول ماراپاتتاۋ راسىمىندە.
بۇدان بۇرىن دا حابارلانعانىنداي، بيىلعى جىلى انار ىرزايەۆ سەكسەننىڭ سەڭگىرىنە شىققان مەرەيتويىن اتاپ وتەدى. جازۋشىنى تۇركسوي باس حاتشىلىعى سالتاناتتى تۇردە قۇتتىقتادى. سونىمەن قاتار، شارا بارىسىندا انار ىرزايەۆتىڭ «مەنىڭ زامانداستارىم» كىتابىنىڭ تۇركى تىلىندە تۇساۋى كەسىلدى.
كونگرەستىڭ اشىلۋىندا «تۇركى الەمىندەگى جىل ادەبيەتشىسى» سىيلىعىنىڭ يەگەرىن ماراپاتتاۋ سالتاناتى ءوتتى. 2017 -جىلى تۇركىستان قالاسىندا وتكەن تۇركى الەمى ادەبي جۋرنالدارىنىڭ سەگىزىنشى كونگرەسىنىڭ شەشىمىنە سايكەس، سىيلىققا بۇل جولى تاتارستان (ر ف) جازۋشىسى زيننۋر مانسۋروۆ يە بولدى.
جيىندا ءسوز العان جىلدىڭ ۇزدىك ادەبيەتشىسى زيننۋر مانسۋروۆ بۇگىن ءوز ومىرىمدەگى ەڭ باقىتتى كۇندەردىڭ ءبىرى ەكەنىن ايتتى.
«بۇعان دەيىن كوپتەگەن ماراپاتتارعا يە بولدىم. الايدا بۇل ماراپات مەن ءۇشىن ەرەكشە. سەبەبى، مەنى بۇل سىيلىققا تۇركى الەمى لايىق دەپ ءبىلدى. ارامىزدا ادەبيەتتى ادەمى شىعارمالارىمەن بايىتقان كوپتەگەن تانىمال جازۋشىلار مەن اقىندارىمىز وتىر. مەن اقىندارىمىز بەن جازۋشىلارىمىزعا جۇگىنەمىن. ءبىز بىرىكسەك كۇشتى بولامىز - تۇركى الەمى ءۇشىن بار مۇمكىندىكتى جاسايمىز. ەكونوميكا، ساۋدا جانە ساياسات سالاسىنداعى بىرلىك پەن ىنتىماقتاستىقتىڭ ماڭىزدىلىعى بەلگىلى. ءبىراق، ەگەر ءبىز مادەني جانە رۋحاني بىرلىككە قول جەتكىزە الساق، وندا بۇل بارىنەن دە ۇلكەن جەڭىس بولادى» ، - دەدى مانسۋروۆ.
ا
ۋ
د
ا
ر
م
ا
: ايان بەكەن ۇلى