جەتىسۋداعى جەتى عاسىر جاساعان كيەلى اعاشقا كەلۋشىلەردىڭ سانى ارتۋدا
استانا مەن الماتى جانە جەتىسۋ وڭىرىنەن جينالعان قوناقتار ساپارىن پانفيلوۆ اۋدانىنداعى كيەلى اعاشتان باستادى، دەپ حابارلايدى قازاقپارات ءتىلشىسى.
كەلۋشىلەرگە كيەلى اعاشتىڭ اڭىزىن شىراقشى رايا نۇرجاپار قىزى ايتىپ بەردى. وسى اعاشتىڭ باسىندا 20 جىلعا جۋىق ۋاقىت تۇرىپ جاتقان شىراقشىنىڭ سوزىنشە، كيەلى اعاشتىڭ 7 عاسىرلىق تاريحى بار.
«مۇنداي اعاش الەم بويىنشا تەك ءۇش ەلدە عانا بار. ءبىرى تۇركيادا، ەكىنشىسى قىتايدا جانە ءۇشىنشىسى وسى، ءبىزدىڭ الماتى وبلىسىنىڭ پانفيلوۆ اۋدانىنا قاراستى ۇلكەن اعاش اۋىلدىق وكرۋگىنىڭ اۋليەاعاش اۋىلىندا ورنالاسقان. كيەلى اعاش قاسيەتتىلىگىمەن دە قۇدىرەتتىلىگىمەن دە كەلۋشىلەردى تاڭعالدىرۋدا. بۇل جەرگە تۋريستەر الەمنىڭ تۇكپىر-تۇكپىرىنەن كەلەدى. كەلۋشىلەردىڭ باسىم بولىگى مۇندا پەرزەنت سۇراپ، باق سۇراپ كەلەدى. باسىندا تۇنەيدى. تىلەكتەرى قابىل بولىپ جاتادى»، - دەيدى رايا نۇرجاپار قىزى.
سونداي-اق، شىراقشى بۇل اعاشتىڭ اڭىزىنا دا توقتالدى. ايتۋىنشا، قىتاي ەلىنەن قاجىلىققا جاياۋ جول تارتقان جەتى اۋليە وسى جەردە ايالداپ، تۇنەگەن.
«جەتى اۋليەنىڭ ىشىندەگى شاماشۇرىپ بابا اسا تاياعىن شانشىپ قويىپ دەمالعان، ال تاڭ سارىدە اعاشتىڭ كوكتەگەنىن كورگەن.
اسا تاياقتان كوكتەپ شىققان اعاشقا جەتى ادامنىڭ قۇلاشى ارەڭ جەتەدى. الىپ اعاشتىڭ جەتى بۇتاعى بولعان. قازىر ول بۇتاعىنىڭ ۇشەۋى بار. تورتەۋى سىنىپ قالدى. 1962-جىلدارى الىپ اعاشتىڭ تامىرىنان وسكىندەر كوكتەپ شىققان. بۇل جەردە اعاشتىڭ تامىرىنان سۋ شىعادى. ول سۋدىڭ ەمدىك قاسيەتى بار. بۇل جەردە ءبىز ءبىر اعاشتى پەرزەنت اعاشى دەپ اتاپ كەتتىك. سەبەبى، بالا سۇيە الماي جۇرگەن جاندار سول اعاش ورتاسىنان وتسە، بالالى بولىپ جاتادى»، - دەيدى شىراقشى.
ايتا كەتۋ كەرەك، پرەسس- تۋر ەكى كۇنگە جالعاسادى. وسى ۋاقىت ارالىعىندا ب ا ق وكىلدەرى مەن بلوگەرلەر جەتىسۋ جەرىنىڭ وزگە دە كورىكتى جەرلەرىمەن تانىسادى.