قازاقستانداعى قىلمىسپەن كۇرەسكە سپۋتنيكتەر جۇمىلدىرىلماق
«بۇگىنگى كۇنى وتاندىق سپۋتنيكتەر قازاقستان رەسپۋبليكاسىنىڭ بارلىق اۋماعىن ءتۇسىرىپ، وسىنىڭ ارقاسىندا عارىشتىق كەسكىندەردىڭ ورنەگى (موزايكاسى) جاسالدى. ءبىز جىل بويى توقسان سايىن قازاقستاننىڭ 21 قالاسىندا قالانىڭ قۇرىلىسىنا مونيتورينگ جاساۋ ءۇشىن ءتۇسىرىلىم جۇرگىزەمىز»، - دەدى ەرعازى نۇرعاليەۆ.
ونىڭ ايتۋىنا قاراعاندا، 2016-جىلدىڭ قاراشا ايىنان باستاپ «قازاقستان عارىش ساپارى» ا ق باس پروكۋراتۋرا جانە «ازاماتتارعا ارنالعان ۇكىمەت» ا ق- پەن بىرلەسىپ، «جەر زاڭ بويىنشا بەرىلسىن - وزدىگىنەن يەمدەنۋدى توقتاتايىق» اتتى جوسپاردى جۇزەگە اسىرۋدا.
«اتالعان جوسپاردىڭ تاپسىرماسىندا گەوپورتالدى قۇرۋ بويىنشا جۇمىس قاراستىرىلعان. ول گەوپورتالعا جەر كاداسترىنىڭ اۆتوماتتاندىرىلعان جۇيەسىنىڭ كاداسترلىق مالىمەتتەرى مەن عارىشتىق كەسكىندەردى جۇكتەۋگە بولادى. ال ەگەر قىلمىس كارتاسى تۋرالى تەرەڭىرەك ايتار بولساق، قالا قۇرىلىسىنىڭ عارىشتىق مونيتورينگىنىڭ باسىمدىقتارىن اتاپ وتۋگە بولادى. عارىشتا تۇسىرىلگەن كەسكىن مەن قالاداعى قىلمىستاردى قالاي بايلانىستىرۋعا بولادى دەگەن سۇراق تۋىنداۋى ىقتيمال. بۇل سۇراقتىڭ جاۋابىن تابۋ ءۇشىن قىلمىستاردىڭ وشاعى قايدا پايدا بولاتىنىن تالداۋ كەرەك. البەتتە، تارتىپتىك باقىلاۋى تومەن ۋچاستوكتاردا قىلمىس كوپ تىركەلەدى. ادەتتە بۇل - ازاماتتار تۇراقتى تىركەۋسىز جانە قالاعا كەلگەنى تۋرالى تىركەلۋسىز تۇرىپ جاتقان، قۇرىلىسى الا- قۇلا اۋداندار»، - دەيدى ەرعازى نۇرعاليەۆ.
وتىرىس بارىسىندا سونىمەن قاتار، قىلمىس كارتاسىنىڭ ارقاسىندا كريمينوگەندى اۋدانداردى انىقتاۋعا بولاتىنى ايتىلدى. ول ءوز كەزەگىندە قىلمىسپەن كۇرەس جۇرگىزۋگە كومەكتەسپەك.
اۆتور: ايان بەكەن ۇلى