مۇحتار تىلەۋبەردى شىڭجاڭ- ۇيعىر اۆتونوميالىق ولكەسى باسشىلىعىمەن ەكىجاقتى ماسەلەلەردى تالقىلادى
ديپلومات ساپار بارىسىندا قىتاي كوممۋنيستىك پارتياسىنىڭ ورتالىق كوميتەتى ساياسي بيۋروسىنىڭ مۇشەسى، ش ۇ ا ر پارتيا كوميتەتىنىڭ حاتشىسى چىن شيۋانگو، ش ۇ ا ر حالىقتىق ۇكىمەتىنىڭ باسشىسى شوحرات زاكير، شىڭجاڭ پارتيالىق كوميتەتىنىڭ ساياسي- قۇقىقتىق كوميسسياسىنىڭ حاتشىسى جۋڭ حايلۋن جانە ايماقتىڭ حالىقتىق ۇكىمەتى پارتيالىق توبىنىڭ مۇشەسى حۋاڭ سانپيڭمەن كەلىسسوزدەر جۇرگىزدى.
قازاقستاندىق ديپلومات قىتاي تاراپىنا «ءبىر بەلدەۋ، ءبىر جول» جوباسىن جۇزەگە اسىرۋداعى قازاقستاننىڭ رولىنە توقتالىپ، قازاقستاننىڭ وبلىستارى مەن ش ۇ ا ر اراسىنداعى ايماقارالىق دامۋدىڭ قاجەتتىلىگىن ايرىقشا اتاپ ءوتتى.
قوس تاراپ تەرروريزم، ەكسترەميزم جانە سەپاراتيزمگە قارسى كۇرەسۋ، قۇقىق قورعاۋ ورگاندارىنىڭ ىنتىماقتاستىعىن نىعايتۋ، ترانسشەكارالىق وزەندەر سالاسىنداعى قارىم- قاتىناس، ەكونوميكالىق بايلانىستار، سونىمەن قاتار ترانسپورتتىق سالا، كونسۋلدىق قىزمەت تاقىرىپتارىن تالقىلادى.
قوس ەل اراسىنداعى «التىن كوپىر» جاعدايى، قىتايداعى قازاق دياسپوراسى، قوس ازاماتتىقتى رەتتەۋ ماسەلەلەرى بويىنشا پىكىر الماسۋ بولدى.
قىتاي تاراپى قازاقستانمەن ءارى قاراي ىنتىماقتاستىقتى دامىتۋعا دايىن ەكەندىكتەرىن ءبىلدىردى، ايتا كەتەرلىگى قازاقستان ش ۇ ا ر ورتالىق ازياداعى ساياسي، ساۋدا- ەكونوميكالىق، مادەني- گۋمانيتارلىق سالاداعى ءىرى ارىپتەسى بولىپ تابىلادى.
قازاقستاندىق دەلەگاتسيا ساپار بارىسىندا قىتايلىق ىسكەر توپتاردىڭ وكىلىمەن كەزدەسىپ، يندۋستريالدىق جانە ينۆەستيتسيالىق ىنتىماقتاستىق جايىن تالقىلادى.