استانادا قىلمىس ەڭ كوپ تىركەلەتىن ورىن اتالدى

استانا. قازاقپارات - ەلوردانىڭ قىلمىستىق قۇقىقبۇزۋشىلىق كارتاسى ارقىلى قالانىڭ قاي بولىگىندە قانداي قىلمىس تىركەلگەنىن ينتەرنەتتەن باقىلاپ وتىرۋعا بولادى.

كارتانىڭ قىزمەتى مەن ونىڭ جۇمىسىن كۇشەيتۋ باعىتى تۋرالى ق ر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءتوراعاسى باعدات مۋسين باس پروكۋراتۋرا عيماراتىندا وتكەن كوشپەلى وتىرىستا ايتىپ بەردى، دەپ حابارلايدى قازاقپارات ءتىلشىسى.

ق ر پارلامەنت سەناتىنىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ مۇشەلەرى بۇگىن باس پروكۋراتۋرادا كوشپەلى وتىرىس وتكىزدى. وتىرىستا «قىلمىستىق قۇقىقبۇزۋشىلىقتار كارتاسى» ينتەرنەت پورتالىن قۇرۋدىڭ (100 ناقتى قادام - ۇلت جوسپارىنىڭ 31- قادامىن ىسكەر اسىرۋ اياسىندا) قۇقىقتىق نەگىزدەرى تالقىلاندى.

جيىندا ءسوز العان باعدات مۋسين قىلمىستىق قۇقىق بۇزۋشىلىق كارتاسىنىڭ قىزمەتىن تىلگە تيەك ەتتى.

«قىلمىستىق ىستەردىڭ كارتاسى ۇلت جوسپارىنىڭ 31-قادامى اياسىندا ىسكە اسىرىلعان. قازىرگى ۋاقىتتا وعان بارلىق قالالار مەن اۋدان ورتالىقتارى قوسىلدى. كارتانىڭ نەگىزگى ماقسات- مىندەتتەرى قانداي؟ ەڭ الدىمەن، ول قۇقىق قورعاۋ ورگاندارى مەن جەرگىلىكتى ورگاندارعا جەدەل ارەكەت ەتۋ جانە الدىن الۋ ءۇشىن ونلاين- تۇردە قىلمىس وشاقتارىنا باقىلاۋ جاساۋعا مۇمكىندىك بەرەدى. ەكىنشىدەن، ءبىزدىڭ ازاماتتارعا تۇرعىلىقتى جەرىندەگى كريمينوگەندىك جاعدايدى ءبىلىپ وتىرۋعا جول اشادى»، - دەدى باعدات مۋسين.

ول سونىمەن قاتار كارتانىڭ شىنايى جۇمىسىنداعى قىزمەتى تۋرالى ايتتى.

«مىنەكەي، ەكراننان قازىرگى ۋاقىتتا استانا قالاسىنىڭ قىلمىستىق قۇقىق بۇزۋشىلىقتىڭ كارتاسىن كورىپ وتىرسىزدار. وندا ءساۋىر ايىنان باستاپ تىركەلگەن بارلىق قىلمىستار تىركەلگەن. سونداي-اق، جىل نەمەسە اي باسىنان بەرگى، تاۋلىك بويعى قىلمىستىق قۇقىق بۇزۋشىلىقتاردىڭ كورسەتكىشىن دە كورىپ وتىرا الاسىزدار. بۇل كارتاعا ينتەرنەت ارقىلى كىرۋگە بولادى»، - دەدى باعدات مۋسين.

تىركەلگەن قىلمىستاردىڭ ءبارى دە كارتادا كورسەتىلىپ تۇر.

«ىڭعايلى بولۋ ءۇشىن بۇل اقپاراتتاردى ءارتۇرلى فورماتتا كورۋگە بولادى. ەگەر كارتانى ۇلكەيتىپ كورسەڭىز، استانا قالاسىنداعى قاي جەردە قىلمىستىڭ كوپ تىركەلەتىنىن كورۋگە بولادى. مىنە، كارتادان كورىپ وتىرعانىڭىزداي ول جەر - سەيفۋللين مەن ءۋاليحانوۆ كوشەسىنىڭ قيىلىسى. بۇل - «ارتەم» بازارىنىڭ ماڭى. البەتتە، نەلىكتەن ول جەر ەكەنى بەلگىلى. سەبەبى، ول جەردە ادام كوپ جينالاتىندىقتان، قىلمىستىق قۇقىق بۇزۋشىلىقتار ءجيى تىركەلىپ تۇرادى»، - دەدى باعدات مۋسين.