موڭعوليا ساياسي ناۋبەت قۇرباندارىنىڭ وتباسىلارىنا وتەماقى تولەيدى
وسىعان بايلانىستى وتەماقى 2019 -جىلدان باستاپ تولەنە باستايدى، دەپ حابارلايدى قازاقپارات ءتىلشىسى.
موڭعوليا العاش رەت 1998 -جىلى زاڭ قابىلداپ، ساياسي ناۋبەت قۇرباندارىن اقتاپ، ولاردىڭ وتباسىلارىنا وتەماقى تولەي باستادى. زاڭ كۇشىنە ەنگەن ساتتەن باستاپ اقتاۋ، شاعىم، ءوتىنىش جاساۋ مەرزىمى ءۇش رەت، تالاپ قويۋ قۇقىعى، تالقىلاۋ مەرزىمى ءتورت رەت ۇزارتىلعان بولاتىن. ال ەڭ سوڭعى ۇزارتىلعان مەرزىم 2011 -جىلدىڭ 30 -جەلتوقسانىندا اياقتالىپ، قايتادان ءوتىنىش قابىلدايتىن قۇقىقتىق ورتا بولماعان ەدى.
سودان بەرى اتتاي التى جىل ءوتتى. وسىعان بايلانىستى ۋاقىت مەرزىمىن قايتادان سوزىپ، زاڭعا تۇزەتۋلەر ەنگىزۋ جايلى زاڭ جوباسىن پارلامەنت ءتوراعاسىنىڭ ورىنباسارى يا. سانجمياتاۆ، دەپۋتاتتار د. سارانگەرەل، ن. ەنحبولددار 2017 -جىلعى 7 -قىركۇيەكتە پارلامەنتكە ۇسىنعان ەدى.
ناتيجەسىندە 2011 -جىلدان بەرى بىرنەشە رەت ۇسىنىلعانىمەن قولداۋ تاپپاعان اتالمىش زاڭ جوباسى پارلامەنتتە تالقىلانىپ، 2018 -جىلدىڭ 12 -قاڭتارىندا تۇپكىلىكتى قابىلداندى. زاڭعا ەنگىزىلگەن تۇزەتۋلەرگە بايلانىستى، ناۋبەت قۇرباندارىن اقتاۋ جانە شاعىمدانۋ مەرزىمى 2 جىلعا جالعاسىپ 2020 -جىلدىڭ 31 -جەلتوقسانىنا دەيىن قابىلدانادى.
ال وتەماقى قاراجاتى 2018 -جىلدىڭ مەملەكەتتىك بيۋدجەتىنە ەنبەگەندىكتەن 2019 -جىلدان باستاپ بەرىلمەك.
ەستەرىڭىزگە سالا كەتەيىك، بۇگىندە موڭعوليادا جالا جابىلىپ، جالعان ساياسي ىستەرمەن قۋعىندالعان، ءولىم جازاسىنا كەسىلگەن نەمەسە باس بوستاندىعىنان ايىرىلىپ سوتتالعان جابىرلەنۋشىلەردىڭ تۋعان بالالارىنىڭ سانى 400 گە جۋىق دەگەن اقپارات بار. سونداي-اق، بۇرىنعى زاڭدا ناۋبەت قۇرباندارىنىڭ ۇرپاقتارى، اعايىندارى مەن نەمەرەلەرىنە وتەماقى بەرىلىپ كەلسە، بۇل جولى زاڭدى جۇبايىنا، تۋعان جانە اسىراپ العان بالاسىنا، قايتىس بولعاننان كەيىنگى 10 اي ىشىندە تۋعان بالاسىنىڭ قايسى بىرىنە بەرىلەدى.
ەگەردە بۇل ادامدار بۇعان دەيىن باسپانا نەمەسە اقشالاي وتەماقىنى قانداي دا ءبىر مەملەكەتتىك مەكەمەدەن العان بولسا، بۇل زاڭعا قامتىلمايدى. زاڭ بويىنشا قۋعىندالعان تۇلعا ءولىم جازاسىنا كەسىلگەن بولسا ونىڭ زاڭدى تۋىسىنا 80 ميلليون توگروگ (34 مىڭ ا ق ش دوللار)، باس بوستاندىعىنان ايىرعان بولسا 40 ميلليون توگروگتىڭ (17 مىڭ ا ق ش دوللار) وتەماقىسى بەرىلەدى.
