ەلباسى تۇركياعا رەسمي ساپارمەن بارادى
باسپاءسوز مالىمەتتەرىنە قاراعاندا، انكاراداعى كەلىسسوزدەردىڭ نازارىندا قازاقستان پرەزيدەنتى نۇرسۇلتان نازاربايەۆتىڭ تۇركياعا وسى جىلدىڭ جازىندا جاسايتىن الداعى رەسمي ساپارىنىڭ ماڭىزدى ماسەلەلەرىن زەردەلەۋ. تاراپتار، سونداي- اق ەكى مەملەكەت باسشىلارىنىڭ توراعالىعىمەن وتەتىن جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ وتىرىسىنا دايىندالۋدا.
ق. ءابدىراحمانوۆتىڭ تۇركيا س ءى م باسشىسى ميەۆليۋت چاۆۋشوعلۋمەن بولعان كەلىسسوزدەرىنىڭ بارىسىندا تاراپتار قازاقستان رەسپۋبليكاسى پرەزيدەنتىنىڭ انكاراعا جاسايتىن ساپارىنىڭ كۇن ءتارتىبى مەن ونىڭ اياسىندا قول قويۋعا ۇسىنىلاتىن قۇجاتتاردىڭ جوبالارىن ۇيلەستىرۋدى تاياۋ بولاشاقتا اياقتاۋعا كەلىستى.
سونىمەن قاتار ءبىرقاتار ەكونوميكالىق كەلىسىمشارتتاردى جاساسۋ ماسەلەسى پىسىقتالۋدا. ىنتىماقتاستىقتىڭ كەلەشەگى زور باعىتتارى: كولىك، اۋىل شارۋاشىلىعى، شاعىن جانە ورتا بيزنەس، تۋريزم. تاراپتار ەكى ەلدىڭ ترانزيتتىك- كولىكتىك الەۋەتىن ودان ءارى دامىتۋعا مۇددەلى.
تۇركيا قازاقستاننىڭ باسىم ينۆەستيتسيالىق ارىپتەسى بولىپ قالۋدا. ەكى ەل ۇكىمەتى پرەزيدەنت ر. ەردوعاننىڭ وتكەن جىلدىڭ قىركۇيەك ايىندا استاناعا جاساعان ساپارى بارىسىندا قول جەتكىزىلگەن ۋاعدالاستىقتاردى جۇزەگە اسىرۋمەن اينالىسۋدا.
2017 -جىلى قازاقستان مەن تۇركيا اراسىنداعى تاۋار اينالىمى وتكەن جىلمەن سالىستىرعاندا 28 پايىزعا ارتىپ، 1,9 ميلليارد دوللاردى قۇرادى. س ءى م باسشىسى قازاقستان ەكونوميكاسىن جاڭعىرتۋ بويىنشا باستامالار مەن «رۋحاني جاڭعىرۋ» باعدارلاماسى تۋرالى ايتتى. بۇل رەتتە جينالعانداردىڭ قىزىعۋشىلىعىن اسىرەسە قازاق ءتىلىن لاتىن الىپبيىنە كوشىرۋ ماسەلەسى تۋعىزدى.
مينيسترلەر تۇركىتىلدەس مەملەكەتتەر ىنتىماقتاستىعى كەڭەسىنىڭ سامميتىنە دايىندىقتى جانە استانادا ورنالاسقان تۇركى اكادەمياسىنىڭ قىزمەتىن تالقىلادى.
سونىمەن بىرگە كەلىسسوزدەر بارىسىندا تاراپتار سيريا جونىندەگى استانالىق ۇدەرىستى ودان ءارى نىعايتۋعا قولداۋ كورسەتتى.
ساپار اياسىندا قازاقستاندىق دەلەگاتسيا تۇركيا ساياسي باسشىلىعىمەن، ىسكەرلىك توپتاردىڭ، ساراپشىلار قاۋىمداستىعىنىڭ جانە بۇقارالىق اقپارات قۇرالدارىنىڭ وكىلدەرىمەن كەزدەسەتىن بولادى.