مينسكىدە ت م د اقپاراتتىق كەڭەسىنىڭ وتىرىسى ءوتتى

استانا. قازاقپارات - مينسكىدە تاۋەلسىز مەملەكەتتەر دوستاستىعى اقپارات اگەنتتىكتەرى باسشىلارى كەڭەسىنىڭ وتىرىسى ءوتتى، دەپ حابارلايدى بەلتا.

وتىرىستا ت م د اتقارۋشى حاتشىسى - اتقارۋ كوميتەتى ءتوراعاسىنىڭ ءبىرىنشى ورىنباسارى ۆيكتور گۋمينسكي اقپارات اگەنتتىكتەرىنىڭ جۇمىسىندا تەك جەدەلدىك قانا ەمەس، ءبىرىنشى كەزەكتە الدىمەن ادىلدىك وتە ماڭىزدى ەكەندىگىن اتاپ ءوتتى.

ويتكەنى كوپ نارسە ءتىلشىنىڭ اقپاراتتى قالاي بەرۋىندە. قوعامنىڭ كوڭىل- كۇيى دە وسىعان بايلانىستى بولماق.

«ءبىز ءومىردىڭ قالاي تەز وزگەرىپ جاتقانىن كورىپ وتىرمىز. ءبارىمىز وتە شيەلەنىسكەن وقيعالار ورتاسىندامىز، كەشەگى جاڭالىق، بۇل - وتكەن تاريح. ال ادامداردا قانداي پىكىر قالىپتاساتىندىعى جانە ازاماتتاردىڭ كوڭىل-كۇيى مەن پوزيتسياسى جۋرناليستەرگە بايلانىستى»، - دەدى ول.

«وقيعا جاڭالىققا اينالماس بۇرىن وڭدەۋدەن وتەدى، ءبىراق ءبارى بىردەي ەمەس، ولار دا جاريالانىپ جاتادى»، - دەپ اتاپ ءوتتى ۆيكتور گۋمينسكي. «بۇگىندە ساۋاتتى بەرىلگەن اقپارات - بەيبىتشىلىك ماسەلەسى».

ت ا س س باس ديرەكتورى سەرگەي ميحايلوۆتىڭ سوزىنشە، اعىمداعى جىلى 100 جىلدىق مەرەيتويىن اتاپ ءوتىپ جاتقان بەلارۋس تەلەگراف اگەنتتىگى (بەلتا) تەحنولوگيالىق جانە شىعارماشىلىق سەرپىلىسكە يە.

بەلارۋس ارىپتەستەرىنىڭ دەڭگەيىن باعالاعان سەرگەي ميحايلوۆ بەلتا لايىقتى جۇمىس اتقارۋدا، دەپ اتاپ ءوتتى.

ت ا س س باس ديرەكتورىنىڭ ءبىرىنشى ورىنباسارى ميحايل گۋسمان بولسا، اقپارات اگەنتتىكتەرىنىڭ حالىقارالىق ىنتىماقتاستىعى قازىرگىدەي سىندارلى ساتتە نىعايا ءتۇسۋى قاجەت دەگەن پىكىردە.

تاۋەلسىز مەملەكەتتەر دوستاستىعى اقپارات اگەنتتىكتەرى باسشىلارى كەڭەسىنىڭ وتىرىسىنا «قازاقپارات» ح ا ا باس ديرەكتورىنىڭ ورىنباسارى جاسۇلان تويبولدين قاتىستى.