شىمكەنتتە جەتىمدەر ۇيىندە وسكەن قازاق بالاسى گولليۆۋدتى قالاي باعىندىردى

 استانا. قازاقپارات - شىمكەنتتە بالالار ۇيىندە تاربيلەنگەن ەركىن يالگاشيەۆ بۇگىندە امەريكالىق پروديۋسەر، اكتەر ءارى رەجيسسەر. وتانى قازاقستان جايلى دەرەكتى فيلم ءتۇسىرۋدى جوسپارلار وتىر.

ونىڭ ايتۋىنشا، گولليۆۋد جۇلدىزدارىنىڭ قاتىسۋىمەن قازاقستاننىڭ ءار ءوڭىرى جايلى فيلم تۇسىرۋگە بولادى، دەپ جازادى Camonitor.kz.

 «مەن گولليۆۋدتىڭ كوپتەگەن اكتەرلەرىمەن جاقسى ارالاسامىن. اگەنتتەرىمەن ەمەس، تىكەلەي وزدەرىمەن سويلەسىپ قولقا سالا الام. ولاردىڭ كوبى قازاقستانعا كەلىپ كورگەن. باسقالارى دا ساياحاتتاپ كەلگىسى كەلەدى. ايگىلى ەدريەن بروۋدي ۋاقىتىنىڭ تىعىزدىعىنا قاراماستان بىلتىر ەۆرازيا كينوفەستيۆالنە كەلدى. جازدا ش ق و- عا دەرەكتى فيلمگە ءتۇسۋ ءۇشىن كەلەدى» ، -  دەيدى ول.

ءبىر قىزىعى، ەركىن اتا- اناسى كوز جۇمعان سوڭ 7 جاسىنان باستاپ بالالار ۇيىندە تاربيەلەنگەن.

«بالالار ۇيىندەگى 10 جىل وڭايعا سوققان جوق. ءبىراق ءومىر سۇرۋگە ۇيرەتتى. باستاپقىدا №1 مەكتەپ- ينتەرناتتا بولدىم. 6 نە 7- سىنىپتا سايرامداعى بالالار ۇيىنە اۋىستىردى. كەيىننەن ءوز كۇنىمدى ءوزىم كوردىم. اسكەرگە باردىم، اسكەردەن سوڭ ينستيتۋتقا ءتۇستىم» ، - دەيدى ەركىن.

بيزنەسپەن اينالىسىپ، سپورت جايلى كىتاپتار، باسپا ونىمدەرىن جارىققا شىعارعان.

1992 -جىلى «سەنىم-2» قازاق- امەريكالىق باعدارلاماسى بويىنشا ا ق ش- تىڭ بيزنەس قۇرىلىمىمەن تانىسۋعا بارادى.

«1995 -جىلى ايەلىم ا ق ش- تا ءبىرجولا قالدى. ءبىرىنشى بولىپ ءوزىم، سوسىن ايەلىم ا ق ش ازاماتتىعىن الدى. ءبىراق ءوز ەلىمنىڭ پاتريوتىمىن. امەريكالىقتاردى ەلگە نە ءۇشىن تارتىپ ءجۇر دەپ ويلايسىز. ەلىمدى الەمگە ناسيحاتتاعىم كەلەدى» ، - دەيدى اكتەر.

ەركەننىڭ ايتۋىنشا، ا ق ش- تا سپورتقا اۋەستىگىنىڭ ارقاسىندا تەز بەيىمدەلىپ كەتكەن. قازاقستان مەن كەڭەس ەلىنىڭ كاراتە بويىنشا بىرنەشە دۇركىن چەمپيونى نيۋ- يوركتە كۇرەس مەكتەبىن اشادى. وندا قازاقشا كۇرەس تەحنيكاسىن ۇيرەتكەن.

ونىڭ بيزنەسى ايتىرلىقتار ءجۇرىپ، 2000 -جىلى لاس- ۆەگاستا قازاقشا كۇرەستەن چەمپيونات ۇيىمداستىرعان.

2012 -جىلى چەمپيونات استانادا قالاسىندا جالعاسىن تابادى. قازاقستان تۋى ءۇشىن امەريكالىق اكتەر دون ۋيلسون مەن وليۆە گريۋنەر توبەلەستى. ولار كينوعا سپورت ارقىلى كەلگەندەر.

ەركىننىڭ ايتۋىنشا، ەكى اكتەر دە قىمبات قالاماقى ءۇشىن ەمەس، ءوزارا دوستىعى ءۇشىن كەلگەن ەكەن.

 «مەن كۇندەلىكتى دايىندالام، ءبىراق 1987 -جىلدان بەرى توبەلەسكە شىقپادىم. قالاماقى ءۇشىن ەمەس، ەركىن ءۇشىن كەلدىم. ونىڭ ورنىندا باسقا بىرەۋ بولسا، كەلمەس ەدىم» ، - دەيدى وليۆە گريۋنەر.

«وسى سپورتتىڭ ارقاسىندا مەنى كينوپروديۋسەرلەر مەن اكتەرلەر شاقىرا باستادى» ، - دەيدى ەركىن.

«وسىلايشا كينەماتوگرافياعا كەلدىم. بۇگىندە ءوزىمنىڭ امەريكالىق ارمانىم ورىندالدى: مەن بۇگىن اكتەر، رەجيسسەر ءارى پروديۋسەرمىن. مەنەن گولليۆۋدقا قالاي كەلدىڭ دەپ سۇراپ جاتادى. مەن تابيعاتىمنان ادامدارمەن تەز ءتىل تابىسقىشپىن. بالالار ءۇيى سوعان ۇيرەتتى. اداممەن ارالاسا بىلەم، ادامداردى تىڭداي بىلەم. ويتپەگەن جاعدايدا بالالار ۇيىندە تۇرۋ قيىن. ال، تابىسقا جەتۋدىڭ ەڭ نەگىزگى سەبەبى - سپورت. ول مەنى كۇرەسۋگە ۇيرەتتى» ، - دەيدى ول.

Stan.kz