استانا مەن تاشكەنت ورتالىق ازيا ەلدەرىنىڭ باسىن بىرىكتىرمەك - ساراپشى پىكىرى

None
None
  استانا. قازاقپارات - استانا مەن تاشكەنت ورتالىق ازيا ەلدەرىنىڭ باسىن بىرىكتىرمەك. مۇنداي پىكىردى «قازاقپارات» ح ا ا تىلشىسىنە ساراپشى جانات مومىنقۇلوۆ ءبىلدىردى.

 «استانادا وتكەلى وتىرعان ورتالىق ازيا ەلدەرى باسشىلارىنىڭ كەڭەسۋ ءماجىلىسى ايماقتىڭ سوڭعى جىلدارداعى ماڭىزدى وقيعاسى بولماق. كوشباسشىلار باس قوسپاعالى وسى كەزەڭ ىشىندە الەم تەز دامىپ، ايتۋلى وزگەرىستەر ورىن الدى. جىلدام دامىعان الەمدە وڭىرلىك ماسەلەلەردە ءوزارا كەڭەسىپ، تاجىريبەسىمەن ءبولىسىپ ارەكەت ەتۋدىڭ قاجەتتىلىگى ارتىپ وتىر. سوڭعى ەكى جىل قاتارىنان ناۋرىز قارساڭىندا وزبەكستان مەملەكەتى باسشىسىنىڭ استاناعا كەلۋى كوپ جايتتى اڭعارتادى. ايماق ەلدەرى سامميتىنىڭ وزبەكستاننىڭ ۇسىنىسىمەن، ءوڭىر ەلدەرىنىڭ قولداۋىمەن قازاقستاندا ءوتۋى ەلىمىز بەدەلىنىڭ ايقىن ايعاعى»، - دەيدى جانات مومىنقۇلوۆ.

ونىڭ پايىمىنشا، ورتالىق ازيا ەلدەرى كوشباسشىلارىنىڭ الداعى كەڭەسىندە قازاقستاننىڭ ديپلوماتيالىق بەلسەندىلىگى مەن وزبەكستانداعى سوڭعى وزگەرىستەردىڭ اسەرىمەن ايماقتا قوردالانعان ماسەلەلەر بويىنشا جوعارى دەڭگەيدە پىكىر الماسىپ، وڭىردە ىقپالداستىقتىڭ ۇزاق مەرزىمدى ستراتەگيالىق نەگىزدەرىن قالىپتاستىرۋعا مۇمكىندىك بار.

«ايماقتىڭ قوس الىپ مەملەكەتى وسىلايشا ءوڭىردىڭ الەمدەگى سۋبەكتىلىگىن ارتتىراتىن كوشباسشىلىق تانىتىپ وتىر. باسەكەلەستىكتىڭ ورنىنا بەلسەندى پراگماتيزمدى باسشىلىققا العان تاشكەنت پەن استانا ءبىرتۇتاس اعزانىڭ مۇشەلەرى ىسپەتتەس ايماق ەلدەرىنىڭ ۇستانىمدارىن دا ەسكەرۋگە ءماجبۇر. وسى ورايدا ورتالىق ازيانىڭ كەلەشەگىندە ەلىمىز ميسسياسىنىڭ قانداي بولاتىنىن انىقتاپ العانىمىز ءجون. ول ءۇشىن تۇتاس ءوڭىر مەن ونداعى وزبەكستان، قىرعىزستان، تۇرىكمەنستان جانە تاجىكستاننىڭ جەكە ورنى، ءوز ميسسياسى مەن ۇلتتىق ەرەكشەلىكتەرىن ەسكەرۋ ايرىقشا ماڭىزدى»، - دەدى ساراپشى.

ساراپشىنىڭ ايتۋىنشا، ءبىرقاتار وزەكتى سالالارعا قاتىستى شەشىمدەردى ورتالىق ازيا ەلدەرى بىرلەسە شەشىم ىزدەۋى قاجەت.

«ءبىز ورتالىق ازيانىڭ كەلەشەگىن قالاي كورەمىز؟ وعان حالىقتاردىڭ كوزقاراسى قانداي؟ ولار نەنى باسىمدىق رەتىندە كورەدى؟ مىنە، وسى سۇراقتارعا جاۋاپتى بىرلەسىپ ىزدەۋىمىز قاجەت. ويتكەنى ءبىزدىڭ ءبىر- بىرىمىزگە كوزقاراسىمىز وزگەرمەسە باسقالاردىڭ دا نيەتى وزگەرمەيدى. مىسالى، ايماعىمىزدا تۇسىنىستىك پەن بەرەكە- بىرلىك بولماسا ەشكىم كەلىپ ەلىمىزگە ينۆەستيتسيا قۇيمايدى، ەكونوميكانى جانە ءوڭىردىڭ بەدەلىن كوتەرمەيدى. وسى رەتتە مادەني- گۋمانيتارلىق بايلانىستاردىڭدا ءمانى اسا زور. 2018 -جىلى ەلىمىزدە وزبەكستان جىلى بولىپ جاريالانۋى اياسىندا وزبەكستان مەن ورتالىق ازيا ەلدەرىنە ارنالعان عىلىمي كونفەرەنسيا وتكىزۋگە بولادى»، - دەپ تۇيىندەدى ءسوزىن جانات مومىنقۇلوۆ.

 ايتا كەتەيىك، ەرتەڭ ەلوردادا ورتالىق ازيا ەلدەرى، سونىڭ ىشىندە قازاقستان، قىرعىزستان ، تاجىكستان، تۇرىكمەنستان جانە وزبەكستان رەسپۋبليكالارى باسشىلارىنىڭ جۇمىس (كونسۋلتاتيۆتىك) كەزدەسۋى وتەدى. سول كۇنى ن. نازاربايەۆ پەن ش. ميرزييەۆتىڭ قاتىسۋىمەن قازاقستانداعى وزبەكستان جىلىنىڭ سالتاناتتى اشىلۋ ءراسىمى وتەدى. سونداي- اق، ەكى ەل كوشباسشىلارى ونەر قايراتكەرلەرىنىڭ گالا- كونسەرتىن تاماشالايتىن بولادى.

اۆتور: مارلان جيەمباي

سوڭعى جاڭالىقتار