اقتوبەدە اۋىل اكىمدىگى تۇرعىندارمەن بىرگە امال مەرەكەسىن اتاپ ءوتتى

 اقتوبە. قازاقپارات - اقتوبە قالاسى، قارعالى اۋىلدىق وكرۋگىنىڭ اكىمدىگى بۇگىن تۇرعىندارعا ارناپ كيىز ءۇي تىگىپ، ناۋرىز كوجە استى.

بۇعان دەيىن تەك كابينەتتە كەزدەسىپ، رەسمي تىلدەسكەن اكىمدىك قىزمەتكەرلەرى اۋىل ادامدارىمەن ءتوس ءتۇيىستىرىپ، ءبىر- بىرىنەن كەشىرىم سۇرادى، دەپ حابارلادى قازاقپارات ءتىلشىسى.

اقتوبە قالاسىنداعى « گەولوگ» مادەنيەت ۇيىندە امال مەرەكەسى ءوتتى. قارعالى سەلولىق وكرۋگىنىڭ تۇرعىندارى ءۇشىن ارنايى كيىز ءۇي تىگىلىپ، داستارقان جايىلدى.

« ءبىز بالا كەزىمىزدە جىل باسىن 14 ناۋرىزدا قارسى الاتىن ەدىك. سول كۇنى اۋىلدىڭ ۇلكەندەرىنە بارىپ، كورىسەمىز. ولار داستارقان جايىپ، ناۋرىز كوجە ۇسىنادى. بيىل اتا ءداستۇرىمىزدى قايتا جاڭعىرتىپ، مادەنيەت ءۇيىنىڭ جانىنا كيىز ءۇي تىگىلدى. مادەنيەت ءۇيىنىڭ قىزمەتكەرلەرى ونەر كورسەتىپ، اجەلەر ءانسامبلى ءان سالدى. وسى جولمەن سالت- ءداستۇرىمىزدى ناسيحاتتاپ، اۋىل تۇرعىندارىنا ۇلتتىق تاعامداردى ۇسىندىق» ، - دەدى « گەولوگ» مادەنيەت ءۇيىنىڭ ديرەكتورى ساعىنتاي قاليەۆ.

اۋىل اكىمدىگى مەن مادەنيەت سالاسىنىڭ قىزمەتكەرلەرىنىڭ توسىن سىيىن حالىق وتە جاقسى قابىلدادى. اقساقالدار باتا بەرىپ، ەلدىڭ بىرلىك- تاتۋلىعىن تىلەدى.

« بۇل كۇنى جاسى ۇلكەندەرگە بارىپ، اماندىعىن ءبىلىپ، جىلدان امان- ەسەن شىققانىمىز ءۇشىن تاۋبە ايتاتىن كۇن. ءارى تاتۋلىققا شاقىرادى. اكىمدىك پەن مادەنيەت سالاسىنىڭ قىزمەتكەرلەرى شاقىرعان سوڭ كەلىپ، ۇلتتىق ءداستۇرىمىزدى جاڭعىرتۋعا ۇلەس قوسىپ ءجۇرمىز. ءبىز ءۇشىن داستارقان جايىلدى. داستۇرمەن ناۋرىز كوجە بەرىلدى. ۇلتتىق بولمىسىمىزدى وسى ارقىلى ناسيحاتتاپ، جەتكىزە بىلسەك، مۇرا ەتىپ قالدىرساق، ءبىز ءۇشىن بۇل دا ءبىر باقىت» ، - دەدى اقتوبە قالاسىنىڭ تۇرعىنى اقبالا نۇرلايەۆا.

اقتوبە قالاسىنىڭ قارعالى اۋىلدىق وكرۋگىندە 20 مىڭنان استام ادام تۇرادى. اۋىل تۇرعىندارى مەكتەپ، بالاباقشامەن قامتاماسىز ەتىلگەن.

« ءبىز ءۇشىن اۋىل تۇرعىندارىنىڭ ءار كۇنى ماڭىزدى. بۇگىن ءداستۇرىمىز بويىنشا ولاردى شاقىرىپ، كونسەرتتىك باعدارلامامىزدى ۇسىندىق. اۋىل حالقى مەن اكىمدىك قىزمەتكەرلەرى كابينەتتە ەمەس، داستارقان باسىندا كەزدەسىپ، ءتوس ءتۇيىستىردى. قىستان امان شىعىپ، جاڭا جىلدى قارسى العان تۇرعىندار الدىندا وكپە- رەنىش بولسا، كەشىرىم سۇرادىق. ءبارى كوڭىلدى، ءوز العىستارىن جەتكىزىپ جاتىر» ، - دەدى اۋىلدىق وكرۋگ اكىمىنىڭ ورىنباسارى گۇلسىم وماروۆا.

ايتا كەتەيىك، اقتوبە قالاسىندا بۇگىن « باۋىرساق» مەرەكەسى وتكىزىلەدى. ناۋرىز مەرەكەسىنە ارنالعان شارا كەزىندە جاستار فلەش- موب ۇيىمداستىرىپ، ۇلتتىق تاعامدار ۇسىنىلادى. ال ونەر ۇجىمدارى كونسەرت قويادى.